काठमाण्डाै – सरकारले श्रम अदालतको मुकाम काठमाण्डौ रहने गरी तोक्ने निर्णय गरेको छ । आज बसेको मन्त्रिपरिषद्को बैठकले श्रम अदालतको मुकाम काठमाण्डौ उपत्यकामा रहने भनिएकोमा त्यसको सट्टा श्रम अदालतको मुकाम काठमाण्डौ रहने गरी तोक्ने निर्णय गरेको सञ्चार तथा सूचना प्रविधिमन्त्री रेखा शर्माले बताउनुभयो ।

सरकारकाे प्रवक्तासमेत रहेकी मन्त्री शर्माले श्रम अदालतको मुकाम काठमाण्डौमा रहने गरी तोक्नेसम्बन्धी सूचना नेपाल राजपत्रमा प्रकाशन गर्ने निर्णय गरेको बताउनुभयो ।

सरकारले राम राजाप्रसाद सिंह स्वास्थ्य विज्ञान प्रतिष्ठान पूर्वाधार तयारी विकास समितिको अध्यक्षमा प्राध्यापक डा. पशुपति चौधरी र सदस्य पदमा डा. वीरेन्द्रप्रसाद यादवलाई नियुक्ति गरेको छ । यस्तै बीपी काेइराला स्वास्थ्य विज्ञान प्रतिष्ठान सदस्य पदमा डा. ज्ञानेन्द्रमान सिंह कार्की मनाेनीत हुनुभएकाे छ ।

उपप्रधान एवम् गृहमन्त्री रवि लामिछानेमाथि सहकारी प्रकणमा छानबिन गर्न यथेष्ठ तथ्य, प्रमाण नभएकाले संसदीय समिति बनाएरै जानुपर्ने स्थिति नदेखिएको भन्दै संसदीय समिति नबनाएको शर्माले बताउनुभयाे ।