काठमाण्डाै – गण्डकी प्रदेशका मुख्यमन्त्री खगराज अधिकारीले पाएको विश्वासको मत असंवैधानिक भएको भन्दै नेपाली कांग्रेसले सर्वोच्च अदालतमा रिट निवेदन दर्ता गराएको छ ।

गएको आइतवार प्रदेश सभामा अधिकारीले विश्वासको मत नपाएको तर सभामुखले विश्वासको मत पाएको घोषणा गरेर संविधानकै उल्लङ्घन गरेको भन्दै नेपाली कांग्रेसले आज सर्वोच्चमा रिट दिएको हो ।

विश्वासको मत लिँदा प्रदेश सभाको बुहमतको गणना अवैधानिक रूपमा गरेर विश्वासको मत पाएको घोषणा भएको निवेदक तथा कांग्रेस संसदीय दलका नेता तथा पूर्वमुख्यमन्त्री सुरेन्द्रराज पाण्डेले दाबी गर्नुभएको छ । उहाँले ठूलो दलको नेताको हिसाबले आफूलाई नै मुख्यमन्त्रीमा नियुक्ति गर्न परमादेशको माग पनि गर्नुभएको छ ।

६० सदस्यीय प्रदेश सभामा बहुमतका लागि ३१ मत पाउनुपर्नेमा मुख्यमन्त्री खगराज अधिकारीले ३० मत पाउनुभएको थियो । तर प्रदेश सभाका सभामुख कृष्णप्रसाद धितालले सर्वोच्च अदालतको आदेशअनुसार भन्दै ३० मतले नै बहुमत पुग्ने गणना गर्नुभएको थियो ।