बाँके – राष्ट्रिय गौरवको सिक्टा सिंचाइ आयोजना डेढ वर्षमा पनि सम्पन्न नहुने देखिएको छ ।

शाखा नहरको जिम्मेवारी पाएको पप्पु कन्स्ट्रक्सनसँगको सम्झौता तोडिएपछि आयोजनाको काम समयमै सम्पन्न हुन नसक्ने देखिएको हो । पप्पुले निर्माण सम्पन्न गरिसक्नुपर्ने समय सीमाभित्र झण्डै ७ प्रतिशत मात्रै काम गरेपछि आयोजनाले ठेक्का सम्झौता तोडेर कालो सूचीमा राख्नका लागि सार्वजनिक खरिद अनुगमन कार्यालयमा पत्राचार गरेको आयोजनाका डिभिजनल इञ्जिनियर प्रकाशबहादुर कार्कीले जानकारी दिनुभयो ।

आर्थिक वर्ष २०६१/६२ मा निर्माण सुरु भएको आयोजना आव २०७६/७७ मा सम्पन्न गर्नुपर्ने समय सीमा रहेको छ ।  सिक्टा सिंचाइ आयोजनाका डिभिजनल इञ्जिनियर कार्कीले अब फेरि नयाँ ठेक्कामा जानुपर्ने भएकाले यसबाट विगतमा तोकिएको समय सीमामा काम सम्पन्न गर्न कठिनाई हुने बताउनुभयो ।

पप्पुसँगको सम्झौता तोडेपछि आयोजनाले अहिलेसम्म उसले सम्पन्न गरेको कामको मूल्यांकन गरिरहेको छ । सम्झौता हुँदा लिएको रकमभन्दा बढी रकम लिएको भए धलौटीबाट असुल गरिने र त्यसबाट पनि अपुग भएमा अन्य प्रक्रियाबाट असुल गरिने आयोजनाले जनाएको छ ।

नेपाल सरकार र साउदी कोषको लगानी रहेको शाखा नहरबाट करिब १६ हजार हेक्टर जमिनमा सिंचाइ सुविधा पुर्‍याउने लक्ष्य राखिएको भएपनि निर्माणमा ढिलाई हुँदा किसानका खेतसम्म पानी पुग्नेमा अनिश्चिता भएको छ ।

२० जुन २०१६ मा मा ८४० दिनमा निर्माण सम्पन्न गर्नेगरी पप्पुसँग निर्माण सम्झौता भएकोमा ठेक्का अवधी असोज २४ गते सम्पन्न भईसकेको छ । सम्झौता अनुसार,९८ करोड ८१ लाख १८ हजार रुपियाको लागत रहेकोमा पप्पुले आठ करोड रुपिया मोविलाईजेशन खर्च पाईसकेको छ ।  जम्मा लगानीमा साउदी कोषको लगानी ४५ प्रतिशत रहेको छ ।