तराई/मधेश केन्द्रित ७ दलले सङ्घीय लोकतान्त्रिक मोर्चा घोषणा गरे

चैत २१, २०८१ बिहीबार १७:५९:४२ | उज्यालो सहकर्मी

काठमाण्डाै – तराई/मधेश केन्द्रित सात दलले सङ्घीय लोकतान्त्रिक मोर्चा घोषणा गरेका छन् । आज काठमाण्डौको बानेश्वरमा एक कार्यक्रम गरेर जनमत पार्टी, जनता समाजवादी पार्टी (जसपा) नेपाल, लोकतान्त्रिक समाजवादी पार्टी (लोसपा) नेपाल, नागरिक उन्मुक्ति पार्टी (नाउपा), राष्ट्रिय मुक्ति पार्टी, जनता प्रगतिशील पार्टी र तराई मधेश लोकतान्त्रिक पार्टी (तमलोपा) ले मोर्चा घोषणा गरेका हुन् ।

संविधान संशोधन तथा मधेशका मुद्दालाई प्रभावकारी ढङ्गले उठाउने उनीहरूको मुख्य प्रतिबद्धता रहेको छ । त्यस्तै मोर्चाले विगतमा नेपाल सरकार र आन्दोलनकारी शक्तिहरूबीच गरिएका २२ बुँदे, ८ बुँदे र ११ बुँदे सम्झौताका साथै अन्य राजनीतिक दल/सङ्गठन र सरकारबीच भए/गरेका सहमति तत्काल कार्यान्वयन गराउने उद्देश्य राखेको छ ।

मोर्चाले लाल आयोगको प्रतिवेदन तत्काल सार्वजनिक गर्न, विभिन्न आन्दोलनमा पक्राउ गरी राज्यले मुद्दा लगाएका बन्दीहरूलाई रिहाइको मागसमेत गरेको छ । उपेन्द्र यादव, महन्थ ठाकुर, राजेन्द्र महतो, डा. सीके राउत, रेशम चौधरी, वृषेशचन्द्र लाल, हृदयेश त्रिपाठीलगायतका नेतासहितका पार्टी मोर्चामा रहेका छन् ।

सङ्घ र प्रदेशबीच स्रोत साधनको न्यायोचित वितरण, सङ्घीयताको मूल्य र मान्यता अनुरूप बाँडफाँटको नीति निर्माण गरी कार्यान्वयन गराउने, प्रहरी समायोजन ऐन २०७६ बमोजिम गर्ने र यथाशीघ्र सङ्घीय निजामती ऐन निर्माण गरी कर्मचारी समायोजनसम्बन्धी कार्य सम्पन्न गर्न मोर्चाले दबाव दिने जनाएको छ ।

अन्तिम अपडेट: चैत २२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्