प्रहरीले दुर्गा प्रसाईंलाई पक्राउ गरी काठमाण्डौ ल्यायो

चैत २९, २०८१ शुक्रबार १३:४१:३१ | उज्यालो सहकर्मी

काठमाण्डाै – गएको १५ गते काठमाण्डौको तीनकुनेमा भएको राजावादी प्रदर्शनका कमान्डर दुर्गा प्रसाईंलाई प्रहरीलाई पक्राउ गरी काठमाण्डौ ल्याएको छ । भारतको असाममा पक्राउ परेका प्रसाईंलाई प्रहरीले झापाबाट विमानमार्फत काठमाण्डौ ल्याएको हो ।

राजसंस्था पुनर्बहालीको माग गर्दै भएको प्रदर्शन हिंसात्मक बन्दा दुई जनाको ज्यान जानुका साथै निजी तथा सरकारी भवन, कार्यालय तथा गाडीमा आगजनी र तोडफोड भएपछि सरकारले प्रसाईंको खोजी गरिरहेको थियो ।

नेपाल प्रहरीका प्रवक्ता दिनेश आचार्यले विज्ञप्ति निकालेर प्रसाईंलाई झापामा पक्राउ गरिएको जानकारी दिनुभएको छ । विज्ञप्तिमा तीनकुनेमा भएको हिंसात्मक प्रदर्शनमा संलग्न रही राज्यविरुद्ध र सङ्गठित अपराधसम्बन्धी कसूरमा फरार रहेका दुर्गा प्रसाईं र प्रसाईंका अङ्गरक्षक दीपक खड्कालाई झापाको भद्रपुरबाट पक्राउ गरेको उल्लेख छ ।

प्रसाईंलाई भारतको असमबाट काँकडभिट्टा हुँदै ल्याउँदाको गाडीसमेत देखिने भिडिओ सार्वजनिक भए पनि प्रहरीले किन झापाबाट पक्राउ गरेको भनिरहेको छ भन्दै धेरैले प्रश्न गरेका छन् । प्रहरी प्रवक्ता आचार्यले भने आफूहरूको क्षेत्राधिकार नेपालमा मात्रै रहेको र अरू देशमा पक्राउ परेको भन्ने केही नरहेको बताउनुभयो ।

नेपाल र भारतबीच सुपुर्दगी सन्धि नभएका कारण दुवै देशले छिमेकी देशमा कसूर गरेर आफ्नो देशमा पक्राउ परेका अभियुक्त वा कसूरदारलाई गुपचुप बुझाउने गरेका छन् । नेपाल प्रहरीका भूतपूर्व नायब महानिरीक्षक हेमन्त मल्ल दुई देशबीच अपराधमा संलग्न व्यक्ति आदानप्रदानसम्बन्धी सुपुर्दगी सन्धि नभएका कारण लामो समयदेखि प्रहरीले अर्को देशभित्र पक्राउ परेका व्यक्तिलाई सीमा क्षेत्रमा पक्राउ गरेको भन्नुपर्ने बाध्यता रहेको बताउनुहुन्छ ।

कतिपय अपराधी खोज्न नेपाल प्रहरीको टोली भारत गए पनि त्यस्तो सहकार्य प्रहरीको अन्तर्राष्ट्रिय सङ्गठन इन्टरपोलबाट हुने गरेको छ । नेपालको प्रहरीले आधिकारिक पक्राउ नेपालको क्षेत्रलाई नै मान्छ ।

अन्तिम अपडेट: बैशाख ५, २०८२

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्