इलाम – इलाम र पाँचथरको सिमानामा पर्ने घुर्बिसे पञ्चमीमा पानीको समस्या समाधान गर्न डीप बोरिङ् प्रविधिको योजना सुरु भएको छ । 

गाउँका बस्ती दिनदिनै बजारीकरणमा परिणत हुदै जाँदा पिउने पानीको समस्या बढ्दै गएकाले समाधानका लागि बोरिङ प्रविधिको योजना सुरु गरिएको हो । 

समुन्द्री सतहदेखि करिब एक हजार नौ सय मिटर उचाइमा रहेको घुर्बिसे पञ्चमी बजारमा पानी निकाल्न गरिएको परीक्षण सफल भएको फाकफोकथुम गाउँपालिका उपाध्यक्ष सरस्वती राईले जानकारी दिनुभयो । उहाँका अनुसार, चार दिनको लामो प्रयासपछि दुई सय ६५ मिटर गहिराइसम्म बोरिङ गरेर ६० एमएम पाइपमा आउने पानी निकालिएको हो । 

इलामको फाकफोकथुम गाउँपालिकाको १५ लाख र पाँचथरको फाल्गुनन्द गाउँपालिकाको १४ लाख गरी २९ लाख रुपैयाँको संयुक्त लगानीमा यस कामको थालनी गरेको उपभोक्ता समिति अध्यक्ष तेजबहादुर चेम्जोङ्ले जानकारी दिनुभयो । 

चेम्जोङ्ले भन्नुभयो, ‘अहिले पानी तान्ने मोटर जडान गर्न थ्री फेज विद्युतको लाइन विस्तार प्रक्रियाको काम भइरहेको छ ।’ अबको एक साताभित्रमा पानी सञ्चालन गरिने समितिको भनाइ छ । अहिले काम गरिरहेको पाथीभरा सोलार एण्ड डिलिङ्ग कम्पनीले १० वर्षसम्म आउने समस्याको जिम्मा लिएर काम गरिरहेको छ । 

बोरिङ् प्रविधि सञ्चालन भएपछि फाकफोकथुमको तीन सय घर र फाल्गुनन्दको दुई सय घरपरिवार प्रत्यक्ष लाभान्वित हुने बताइएको छ । पानी प्रतिघर चार लिटरका दरले वितरण गरिने पनि जनाइएको छ ।