आकाश खुले पनि डम्म बादल लागेजस्तै भयो टुँडिखेल

फागुन १७, २०७५ शुक्रबार ११:२१:१ | उज्यालो सहकर्मी

काठमाण्डौ – आकाश खुले पनि टुँडिखेलको वातावरण शुक्रबार बिहानभर बादल लागेजस्तै भयो । अघिल्लो दिनझैं आकाशबाट पानी त परेको थिएन । तर त्यहाँ पुग्ने प्रायः सबैका आँखा ओभानो भएनन् ।

हेलिकोप्टर दुर्घटनामा निधन भएका पर्यटनमन्त्री रवीन्द्र अधिकारीसहित सातै जनाको श्रद्धाञ्जली कार्यक्रमले टुँडिखेलको वातावरणमा सन्नाटा छायो । राष्ट्रपति, प्रधानमन्त्री, मन्त्री, विभिन्न राजनीतिक दलका वरिष्ठ नेता, अरु विशिष्ट व्यक्तिहरु, नेता, कार्यकर्ता र सर्वसाधारण भावुक मुद्रामा श्रद्धाञ्जली कार्यक्रममा उपस्थित भए ।

राष्ट्रपति विद्यादेवी भण्डारीले भारी मनले दिवंगत मन्त्री अधिकारीको पार्थिव शरीरमा श्रद्धाञ्जली अर्पण गर्नुभयो । प्रधानमन्त्री केपी शर्मा ओलीले पनि उस्तै भावुक मुद्रामा राष्ट्रिय झण्डा ओढाउनुभयो । नेकपाका अर्का अध्यक्ष पुष्पकमल दाहाल प्रचण्ड सहितका नेता कार्यकर्ताले दिवंगत मन्त्री सहित निधन भएका सबैको पार्थिव शरीरमा श्रद्धाञ्जली अर्पण गरे । विभिन्न राजनीतिक दलका नेता, कार्यकर्ता र सर्वसाधारणले पनि मलिन अनुहार बनाएर श्रद्धाञ्जली दिए ।

परिवारका सदस्यको रुवाबासीले सबैलाई स्तब्ध बनायो । नेता, कार्यकर्ता र आफन्तले सम्हाल्न खोजे

राति अबेरमात्र पोष्टमार्टमको काम सकिएपछि बिहान ८ बजेपछि मन्त्री अधिकारी, यति एयरलाइन्सका प्रबन्ध निर्देशक आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ र निर्देशक ध्रुव भोछिभोया, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, हेलिकप्टरका क्याप्टेन प्रभाकर केसी र मन्त्री अधिकारीका सुरक्षाकर्मी अर्जुनकुमार घिमिरेको शव श्रद्धाञ्जलीको लागि टुंडिखेलमा राखिएको हो ।

काठमाण्डौबाट तेह्रथुमको चुहानडाँडामा विमानस्थलको सम्भाव्यता अध्ययनका लागि मन्त्री अधिकारीसहितको टोली कार्यक्रम सकेर ताप्लेजुङको पाथीभरा हुँदै काठमाण्डौ फर्किने क्रममा हेलिकप्टर दुर्घटनामा मन्त्री अधिकारीसहित ७ जनाकै निधन भएको हो ।

सबै तस्बिर : रासस

अन्तिम अपडेट: बैशाख २, २०८२

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्