आहा रारा गोल्डकपः त्रिभुवन आर्मीलाई हराउँदै थ्रीस्टारले उचाल्याे उपाधि

फागुन १८, २०७५ शनिबार १९:८:५ | उज्यालो सहकर्मी

कास्की - त्रिभुवन आर्मीलाई सडेन डेथमा पराजित गर्दै थ्रीस्टारले १७ औं आहा रारा गोल्डकपको उपाधि जितेकाे छ ।

थ्रीस्टारले यो प्रतियोगिताको उपाधि जितेको यो पाँचौ पटक हो । पोखरा रंगशालामा शनिबार सम्पन्न फाइनलमा शीर्ष डिभिजनका शीर्ष दुई टिमबीच रोमाञ्चक प्रतिस्पर्धा देखियो । नियमित र अतिरिक्त समयमा दुवै टोलीले २–२ गोलको बराबरी खेलेपछि खेल टाइब्रेकरमा धकेलिएको थियो ।

त्यसमा पनि दुवै टिमले चार चार गोलको बराबरी खेले । आर्मीका लागि भरत खवास, जर्ज प्रिन्स कार्की, सन्तोष तामाङ, विवेक बस्नेतले गोल गरे भने विकेश कुथुको प्रहार थ्रीस्टारमा गोलकिपर एलन न्यौपानेले बचाए ।

थ्रीस्टारका लागि रञ्जि धिमाल, रुपेश केसी, विक्रम लामा, अनन्त तामाङले गोल गरे भने सुशील रायको प्रहार बारमा लागेर फर्कियो । त्यसपछि सडेन डेथमा थ्रीस्टारका मिचेन तामाङले गोल गर्दा आर्मीका विकाश खवासको प्रहारलाई एलेनले बचाए ।

अतिरिक्त समयको आठौं मिनेटमा बिकास खवासलाई फल गरेपछि थ्रीस्टारका सुनील बल रातो कार्ड खाँदै मैदान बाहिरिएसँगै थ्रीस्टार १० खेलाडीमा समेटिएको थियो । त्यसपछि आर्मीले खेलमा पकड जमायो । अतिरिक्त समयको १५ औं मिनेटमा आर्मीले अग्रता बनायो । सन्तोष तामाङको लामो फ्रिकिक क्लियर गर्न लाग्दा थ्रीस्टारका कप्तान विक्रम लामाको हेडर आफ्नै पोष्टमा गोल भएको थियो ।

तर, त्यसको ७ मिनेटपछि थ्रीस्टारले बराबरी गोल फर्कायो । पिटर सेगुनको हेडर पोलमा लागेर फर्किएपछि आर्मीका गोलरक्षक बिकेश कुथुले राम्ररी कलेक्ट गर्न नसक्दा विक्रम लामाले गोल गरेका थिए । यसअघि नियमित समयको पाँचौं मिनेटमै टेकबहादुर बुढाथोकीले गोल गरी आर्मीलाई सुरुआती अग्रता दिलाएका थिए । उनले दीपक गुरुङको क्रस सदुपयोग गरेका थिए ।

पहिलो हाफको इन्ज्युरी समयमा थ्रीस्टारले पेनाल्टीमार्फत खेल बराबरीमा ल्यायो । आर्मीका खेलाडीले बक्सभित्र ह्याण्ड गरेपछि रेफ्री सुदिस पाण्डेले थ्रीस्टारलाई पेनाल्टीको अवसर दिएका थिए । एक साता चलेको प्रतियोगितामा १२ टिमको सहभागिता थियो । सेमिफाइलनमा थ्रीस्टारले एपीएफ र आर्मीले दाउफिन्स टिमलाई हराउँदै उपाधि भिडण्त गरेका थिए ।

अन्तिम अपडेट: कात्तिक १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्