बझाङ – बझाङको घरेलु तथा साना उद्योग विकास कार्यालयमा चरम लापरबाही भएको भेटिएको छ ।

कार्यलय प्रमुख सन्तोसी नेपालीको लापरबाहीले उपभोक्ताहरुको लागि दिनुपर्ने उद्योग व्यवसायको झण्डै २३ लाख रकमको काम नहुने भएको छ ।

असार महिना बित्न लाग्दा समेत साना उद्योग व्यवासायीलाई अनुदान दिनुपर्ने २३ लाखको हालसम्म उपभोक्ताहरुसँग सम्झौता हुन सकेको छैन । 

सम्झौताविना कार्यक्रम नहुने भएपछि अनुदान पाउन छनौट भएका व्यवासायीहरु आक्रोशित भएका छन् । 

कार्यालयबाट उद्योग व्यवसायीहरुका लागि दिनुपर्ने सामाग्रीहरुको सूचना प्रकाशित गरी सप्लायर्सहरुबाट सामान खरीद गर्नु पर्ने भए पनि कार्यलय प्रमुख नेपालीले सप्लायर्सहरुबाट कमीसनको चलखेल नमिल्दा सामाग्री ढुवानीमा ढिलाई हुने भएपछि यस वर्षको यो कार्यक्रमको रकम फ्रिज हुने निश्चित भएको हो । 

कार्यलयको उपयुक्त प्रविधि हस्तान्तरण अन्तरगत कुखुरा फर्म, सिलाईकटाई, व्यवसायिक तरकारी खेती, मासु पसलका उद्यमी व्यवसायीका लागी दिनु पर्ने सामाग्रीहरु प्रमुखकै कमिसनको तालमेल नमिल्दा अहिले सम्म सूचना प्रकाशित भएको छैन ।

घरेलु विकासको उपयुक्त प्रविधि हस्तान्तरणका लागि झण्डै तीन महिना अघि नै ३० जना उद्योग व्यवसायी किसनहरुलाई छनौट गरेको थियो ।

‘हामीलाई उपयुक्त प्रविधि हस्तान्तरणमार्फत प्रतिव्यक्ति ५० हजार देखि एक लाखसम्म बराबरको अनुदान सामाग्री पाईने भनेर निवेदन माग गरियो, चैनपुरमा कुखुरा व्यवसाय गर्दै आएका लोकेन्द्र खड्काले भने, तर हाकिम सन्तोसी नेपालीको गलत नियतले हामीहरुले सरकारी सेवा बाट बन्चित भयाैं ।’

उनी जस्तै अर्का सिलाइकटाई व्यवसायी मिन बहादुर दमाईले भने,‘सिलाई कटाई मेसीन पाइएला भनेर म ढुक्क भएको थिएँ । हाल आएर हाकिमले यो कार्यक्रम हुँदैन भनेपछि निराश भएँ,’ उनले भने, ‘यस कार्यक्रमका लागि भनेर कार्यालयबाट छनौट भएका व्यवसायीहरुबाट एक एक हजार रुपैयाँसमेत कार्यलयले असुल गरेको छ ।’

उनी जस्तै दिपक नेपाली,कुखुरा व्यवसायी पे्रम प्रकाश छन्त्याल, खड्क दमाई, लगायतका व्यवसायीहरुको समेत यस्तै गुनासो छ । 

कार्यलय प्रमुख नेपालीले धनगढीमा रहेका सप्लायर्सहरुँंग पैसाको लेनदेन नमिल्दा विभागबाट आर्थिक वर्षको दोस्रो चौमासिकमा नै निकासा भएको यस कार्यक्रमको बजेट कार्यक्रममा ढिलाई भएको छ ।

यता घरेलु विकास समितिको उद्योग विकास अधिकृत सन्तोसी नेपालीले भने यस कार्यक्रममा कुनै गलत नियत नभएको र प्राविधिक कारणवश ढिला भएर यसवर्ष यो कार्यक्रम नहुने जानकारी दिनुभयो ।