एमालेले लुम्बिनी प्रदेश सरकारमा पठाउने पाँच जना मन्त्रीको नाम...
बैशाख ६, २०८१ बिहिबार
कास्की - अन्नपूर्ण पदमार्गको हिमपहिरोमा हराएका मध्ये दुई जनाको शव फेला परेको छ ।
गएको माघ ३ गते अन्नपूर्ण पदमार्ग, हिंकु खोंचको हिमपहिरोमा परेर ४ जना कोरियन र ३ जना नेपाली हराएका थिए । तीमध्ये दुई जनाको शव शनिबार फेला परेको जिल्ला प्रहरी कार्यालय कास्कीका प्रवक्ता एवम् प्रहरी नायब उपरीक्षक राज कुमार केसीले जानकारी दिनुभयो ।
भेटिएका दुबै जना बिदेशी रहेको केसीले बताउनुभयो । हराएकामध्ये २ जना नेपाली गाइडको शव यसअघि नै फेला परिसकेको छ ।
कास्कीको अन्नपूर्ण गाउँपालिकास्थित हिंकु खोंच र देउरालीको बीचमा मोदी नदी किनारमा स्थानीयले शव देखेपछि प्रहरीलाई खबर गरेको उहाँले बताउनुभयो । शव हेलिकप्टर मार्फत पोखरा ल्याउने तयारी साथ हेलिकप्टर त्यसतर्फ गइसकेको उहाँको भनाइ छ ।
दुई नेपालीमध्ये एक जनाको शव चैतमै फेला परेको थियो भने अर्का एक जनाको ४ दिनअघि फेला परेको थियो । अहिले हिउँ पग्लिएका कारण शव खोज्न थालिएको हो । पहिरोमा परेर हराएका मध्ये ३ जना अझै बेपत्ता छन् ।
कास्कीका उज्यालो सहकर्मी सुमन गुरुङ रेडियाे तरङ्गमा पनि काम गर्नुहुन्छ ।