श्रीमानले कतारमा कमाउनुभयो, मैले पराले घरलाई पक्की बनाएँ

 भदौ ५, २०७५ मंगलबार १५:३१:५६ | उज्यालो सहकर्मी

हीरा उराव सरदार/सुनसरी । 

मेरो श्रीमान् कतारमा हुनुहुन्छ । उहाँ कतार बस्न थालेको चार वर्ष भयो । अब दुई वर्षपछि गाउँघरमै केही गर्ने गरी फर्किन्छु भन्नुभएको छ । श्रीमान् विदेश हिँडेपछि मेरो जीवनमा धेरै उतारचढाव आए ।

सासु, ससुरासँग भिन्न भएर बसेका थियौं । उहाँ विदेश गएपछि दुई छोराछोरी र मलाई यहाँ बस्ने घरको पनि समस्या थियो । परालको सानो घर थियो । सिधा भएर हिँड्दा पनि ठोकिन्थ्यो । छोराछोरीलाई कसरी स्कुल पढाउने, के खुवाउने ? केही समय निकै सास्ती भयो । 

दिक्क लाग्थ्यो । यसो गाउँतिर हिँड्दै गर्दा मान्छेहरु जम्मा भएको देखेँ । अनि के रहेछ भनेर बुझ्दा त त्यहाँ नयाँ कुराहरु सिकाईंदो रहेछ । खासै त बुझ्दिन थिएँ, तर उनीहरुले भनेका कुरा छेवैमा बसेर सुन्दा पनि मलाई आँट आउँथ्यो । 

ऋण तिरेर बचेको ५० हजार रुपैयाँ थियो । मैले थोरै जग्गा किन्छु भन्ने सोच बनाएँ । नपुगेको पैसा पछि दिने शर्तमा जग्गा किनें । परालको घर हावा आउँदा पनि उड्छ कि भन्ने चिन्ता हुन्थ्यो । अब सानो घर बनाउँछु भन्ने भयो । तर पैसा थिएन ।

श्रीमानले पठाएको पैसा थोरै थोरै जम्मा गरेर मैले घर बनाउने ढुंगा जम्मा गरें । सबैकुरा थोरै थोरै गर्दा पनि हुने रहेछ । जब गाउँमै सञ्चालन भएको वित्तीय साक्षरता कक्षामा बस्न पाएँ, तब मलाई घर बनाउन आँट आयो ।

घर बनाउन ठेक्का दिएँ । श्रीमानलाई पनि घर चाहिन्छ, परालको घरमा हुँदैन भनेर सम्झाएँ । उहाँले पनि पैसा पठाउनुभयो । मैले पनि गाउँघरमै सकेसम्म काम गरेर घर खर्च आफैंले पुर्‍याउने बाटो खोजें । 

अहिले सानो घर पनि बनाएको छु । म आफूमा पनि धेरै कुरामा परिवर्तन आएको छ । हाम्रो समुदायमा केटी मान्छे नयाँ मान्छेसँग बोलेको, हिँडेको देख्दा अनेक कुरा गर्छन् ।

मलाई पहिले त नयाँ मान्छेसँग बोल्न डर लाग्थ्यो । खाइहाल्छन् कि जस्तो लाग्थ्यो । तर हिजोआज म निर्धक्क भएर हिँड्न, बोल्न र आफ्ना योजना बनाउन सक्ने भएको छु ।

विदेशमा पनि पैसा बोटमा फल्दैन । यहाँभन्दा बढी दुःख गर्नुपर्छ । त्यसैले म पनि यहाँ दुःखै गर्छु । भोलिका लागि केही वचत गर्न सकियोस् भन्ने लाग्छ । सूँगुर पालेको छु, त्यही बेचेर आम्दानी हुन्छ ।

मैले आफ्नो खर्च पुर्‍याउँदा पनि निकै फाइदा हुँदोरहेछ । श्रीमान्ले पठाएको पैसाको हरहिसाब राख्ने गरेको छु  । त्यसो हुँदा बचत पनि हुने र भएको खर्च देखाएर कुन चाहिँ कटौती गर्न सकिएला भनेर सोचिंदो रहेछ ।

 विदेशमा भए पनि श्रीमानसँग सरसल्लाह नगरी कुनै काम गर्दिन । घर सल्लाह गर्नुपर्छ भन्ने बुझेको छु । हामीबीच विश्वास पनि बढेको छ । 
 

अन्तिम अपडेट: पुस ४, २०८१

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

3 Comments

  • सुक बहादुर Tamang

    Aug. 31, 2018, 4:13 p.m.

    धेरै राम्रो लाग्यो

  •  0 Reply

  • Jit bahadur mijar

    Aug. 22, 2018, 8:38 a.m.

    I respect to her

  •  0 Reply

  • Thapa Benbahadur

    Aug. 21, 2018, 5:45 p.m.

    हाम्रो समाजमा घरेलु कामकाज काे साथै व्यवहारिक कुराहरु काे बारेमा शिक्षा दिन अत्यन्तै अावश्यक छ यसाे गरे सिमित अाय बाट पनि व्यवस्थित तरिकाले घर व्यवहार चलाउन सकिन्छ भन्ने विषयमा शिक्षा एवम् भराेशा दिलाउन संस्थाले सहयाेग पुराउन सकिन्छ ।

  •  0 Reply

तपाईको प्रतिक्रिया

समाचार

लोकप्रिय

१

एनपीएलको सर्वोत्कृष्ट नेपाली खेलाडी दीपेन्द्रले पाए कार

२

काठमाण्डौ महानगरका प्रमुख प्रशासकीय अधिकृत गुरागाईंलाई कारबाहीका लागि सिफारिश

३

बाजुरा केन्द्रबिन्दु भएर बिहान ५ दशमलव २ म्याग्निच्यूडको भूकम्प

४

अमेरिकाले सिरियाका नेता अल–शराको टाउकोबारे घोषणा गरेको पुरस्कार हटायो

विचार

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

मेरो कथा मेरो भोगाई