'पीपीई' भित्र लुकेकी ऊ

वैशाख २५, २०७८ शनिबार ९:२१:२३ | दामोदर न्याैपाने

कविता

मैले उसको र उसले मेरो
अनुहार नदेखेको एक वर्ष भयो
एक वर्षअघि देखेको उसको अनुहार
मेरो आँखै अघि घुमिरहेको छ
उसले पनि मेरो झुसे अनुहार
झलझली सम्झिरहेकी होली
याद छ मलाई
मैले पहिलो पटक
उसलाई लिपिस्टिक गिफ्ट दिएको
आज पनि उसको ओठमा
पक्कै रातै रङको लिपिस्टिक हुनुपर्छ
उसको आँखाको गाजल दुरुस्त उस्तै हुनुपर्छ ।

ऊ हरदिन पीपीईमा गुम्सिन्छे
अनि कहिलेकाहीँ निसासिन्छे
अचेल उसको मन बिथोलिएको छ
सँगै निद्रा र भोक खोसिएको छ
अचेल उसको फोन पनि आउँदैन
यताबाट गर्दा पनि हत्तपत्त उठ्दैन
उसले फेसबुक र इन्स्टामा
फोटो र स्टोरी नराखेको
महिनौँ भइसक्यो
एक वर्षअघि
रेस्टुरेन्टमा खाएको कफीको स्वाद
जिब्रोले पनि बिर्सिसक्यो
अचेल ऊ छुट्टीमा बसेको पनि थाहा छैन
रातदिन बिरामीको उपचारमा खटिन्छे
कहिले ऊ खानै बिर्सिन्छे
बिरामीको स्याहारमा अहोरात्र खटिन्छे
र त घर जानै बिर्सिन्छे
उसले घरमा खाना नखाएको
कति दिन भइसकेछ
आमाले आफ्नै रेसिपीमा पकाएको
परिकारको स्वाद उसले बिर्सिसकिछ ।

कसैले उसलाई
पीपीईभित्र लुकेकी देवी भन्दा रहेछन्
अनि कसैले भगवान् पनि भन्दा रहेछन्
उसलाई सधैँ हँसमुख देख्दा
आधा रोग त्यसै कम हुन्छ रे
कहिले अनायासै उसको आँखा रसाउँदा
आँखामा धुलो पस्यो भन्छे रे
अनि दगुर्दै बाथरुम पुग्छे रे
रोएर मन हलुका भएपछि फर्किन्छे रे
उसलाई थाहा छ
उसको अनुहार मलिन हुँदा
बिरामी झन् आत्तिन्छन्
अनि बिस्तारै
औषधिले पनि काम गर्न छाड्छ
रोगले शरीरलाई जित्छ भनेर ।

कतिले भन्दा रहेछन्
बिरामीको स्याहार गर्नु उसको काम हो
भोकभोकै र अनिद्रा बस्नु उसलाई आराम हो
मान्छे यति निर्दयी कसरी बन्न सक्छ रु
के मान्छे यस्तो पनि भन्न सक्छ रु
ऊ पनि थाक्दी हो
आराम दिनुपर्छ
भोक उसलाई पनि लाग्छ
खान दिनुपर्छ ।

हो, मैले चाहिँ बुझेको छु
'पीपीई' भित्र लुकेकी ऊ ।

अन्तिम अपडेट: पुस ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

दामोदर न्याैपाने

उज्यालाेमा कार्यरत दामोदर न्याैपाने समसामयिक विषयमा कलम चलाउनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्