सुन ल्याइदिने शर्तमा ऋण लिएर मलेसिया जाँदा

भदौ ८, २०७५ शुक्रबार १२:२२:१६

हिराधन राई/अर्खौले, खोटाङ ।

गाउँबाट विदेश जाने लहर चलेको थियो । विदेश जानेहरुले विदेशमा काम र तलब राम्रो छ भनेर चिठ्ठी पठाउँथे । उनीहरुका कुरा सुनेरै मैले पनि विदेश जाने सोच बनाएँ । त्यतिबेला मेरो बिहे भएको थिएन ।

बिहे गरेपछि जिम्मेवारी थपियो । त्यसमा बुवाआमाले पनि विदेश गएकाहरुले राम्रो कमाइरहेका छन भन्दै विदेश जा भन्नुभयो । म २१ वर्षको थिएँ । पढाई एसएलसीसम्म मात्रै थियो । घरको जेठो छोरो भएकोले पनि आर्थिक भार थपिँदै गएकाले २०६० कात्तिकमा म मलेसिया गएँ ।

म्यानपावरले मलाई मलेसियाको टङ्गिम इलेक्ट्रोनिक्स एमएसएन बीएचडी कम्पनीमा ८० हजार रुपैयाँ लिएर पठायो । म्यानपावरलाई दिने त्यो पैसा मैले साहुसँग ऋण लिएको थिएँ । त्यो पैसाको ब्याज सयकडा ५ लगाएका थिए साहुले । त्यति मात्रै होइन मलेसियाबाट फर्किंदा एक तोला सुन पनि ल्याइदिने सर्तमा बल्ल पैसा पाएको थिएँ ।

मलेसिया पुगेपछि मैले यहाँ भनेकै काम पाएँ । काम उही भएपनि तलब चाहिँ २० रिंगिट कम पाएँ । यहाँ मलाई ४८१ रिंगिट भनिएको थियो तर मलेसियामा ४६१ रिंगिट मात्रै पाएँ । ओभरटाइम पनि पाएको थिएँ । त्यसैले मैले महिनाको ५५० रिंगिटसम्म कमाएँ ।

विदेशमा अरुका समस्याको कसैलाई ख्याल हुँदैनथ्यो । घरमा आफ्ना पीडा सुनाउनलाई अहिलेको जस्तो सबैका हातमा मोबाइल थिएन । त्यसैले चिठ्ठीमै लेख्नुपर्थ्याे । लेखेको चिठ्ठी घर पुग्न ३/४ महिना लाग्थ्यो ।

यसै गर्दा गर्दै ३ वर्ष बित्यो । बिदामा घर आएँ । बिदाको समय सकिएपछि फेरि त्यही ठाउँमा फर्किएँ । पहिलेको भन्दा मलाई दोस्रो पटक जाँदा निकै सजिलो भइसकेको थियो । एक त काम पनि जानियो अनि ठाउँ पनि त्यही । त्यसैले अरु ५ वर्ष मैले त्यही ठाउँमा बिताएँ । ८ वर्ष बस्दा मैले झण्डै २२ लाख रुपैयाँ कमाएँ ।
त्यही पैसाले अर्खौले बजारमा घर बनाएँ । अनि बाँकी रहेको पैसाले चाहिँ हलेसी तुवाचुङ नगरपालिका– १० दुक्सेलिमामा रहेको गुप्तेश्वर महादेवको मन्दिर अगाडि पूजा सामग्रीको पसल चलाइरहेको छु । त्यही पसलको कमाईले घर चलिरहेको छ ।

(नवकिरण सेवा समाज, दुर्छिम खोटाङद्वारा सञ्चालिक सुरक्षित आप्रवासन सामी परियोजनाका सामाजिक परिचालक तारानाथ फुयलले गर्नुभएको कुराकानीमा आधारित)

अन्तिम अपडेट: पुस ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्