दुबईबाट २ सय ७० जना बोकेर जहाज नेपाल उड्यो, टिकट काटे पनि जरिवाना तिर्न नसक्दा ३ जना यतै रोकिए

असार ९, २०७८ बुधबार १६:१२:५३ | उमाकान्त पाण्डे

यूएई – कोरोना महामारीको दोस्रो लहरका कारण नेपाल सरकारले अन्तर्राष्ट्रिय उडानमा प्रतिबन्ध लगाएपछि समस्यामा परेका नेपाली बोकेर संयुक्त अरब एमिरेट्स यूएईको दुबईबाट पहिलो चार्टड विमान नेपाल उडेको छ ।

यूएईको दुबईबाट बुधबार दिउँसो पाँच नेपालीको शवसहित २ सय ७० जना बोकेर नेपाल एयरलाइन्सको वाइड बडी जहाज काठमाण्डौ उडेको हो ।

आजको उडानमा २ सय ३७ पुरुषसहित २८ जना महिला, ३ जना बालबालिका र २ जना शिशु गरी जम्मा २ सय ७० जना नेपाल फर्किएका हुन् ।

आज फर्किएका धेरै जसो यूएईमा जागिर गुमाएका, भिजिट भिसामा आएर यतै अड्किएका, करार अवधि सकिएका, अत्यावश्यक कामले नेपाल फर्कनु पर्ने व्यक्तिहरू, बिरामी एवं सुत्केरी महिला छन् ।

उडानमा विभिन्न कारणले यूएईमा ज्यान गुमाएका ५ जनाको शवसमेत लगिएको छ । यूएईमा ज्यान गुमाएका स्याङ्जाका लोकबहादुर मगर र रोशबहादुर आले, नवलपरासीका सोमबहादुर गुरुङ र खडकबहादुर थारु र सिन्धुपाल्चोकका साङ दोर्जे शेर्पाको शव नेपाल लगिएको नेपाल एयरलाइन्स यूएई शाखाले जनाएको छ ।

आजको उडानमा टिकट काटेका ३ जना पुरुष ओभरस्टे बापतको जरिवाना तिर्न नसक्दा जान पाएका छैनन् । टिकट रद्द गरेर प्रतीक्षा सूचीमा राखेका अन्य ३ जनालाई तत्कालै टिकट प्रदान गरेर उडान भरिएको एयरलाइन्सका यूएई प्रमुख टिकाराम पंगेनीले उज्यालोलाई जानकारी दिनुभयो । ५० जना भन्दा धेरैको अध्यागमन सम्बन्धी समस्या भएकाले जहाज तोकिएको समयभन्दा झण्डै १ घण्टा ढिला गरी उडेको हो ।

नेपाल फर्किएका सबैले कोरोना परीक्षणको बारकोड सहितको प्रमाणपत्र साथमा लिएर फर्किएका हुन् । नेपाल एयरलाइन्सको अर्को उडान जुन ३० मा हुने नेपाल एयरलाइन्सको यूएई हेर्ने अधिकारिक एजेन्सी एन्टाका सजु पौलले जानकारी दिनुभयो ।

नेपालमा कोरोनाको दोस्रो लहर फैलिएपछि गएको वैशाख २३ गतेमध्ये रातिदेखि अन्तर्राष्ट्रिय उडानमा प्रतिबन्ध लगाइएको थियो । उडान रोक्दा घर फर्कन टिकट हातमा लिएका यात्रुसमेत यूएईमै रोकिएका थिए । कतिपयले उच्च जोखिम मोल्दै दुबई दिल्ली हुँदै पनि यात्रा गरिसकेका छन् । युएईमै अड्किएका कतिपय श्रमिकको भने भिसा अवधिभन्दा धेरै बसेकाले ओभरस्टे बापतको जरिवाना पनि सुरु भइसकेको छ ।

अन्तिम अपडेट: पुस ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उमाकान्त पाण्डे

उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्