म्याग्दी - कालीगण्डकी करिडोरको बेनी–जोमसोम सडक खण्ड आजदेखि दैनिक पाँच घण्टा बन्द हुने भएको छ । करिडाेरकाे बेनी–जोमसोम खण्ड रहेको घाँसा, काभ्रेभिरलगायतका ठाउँमा सडक चक्लाबन्दी गर्न लागिएका कारण आजदेखि याे सडक खण्ड दैनिक पाँच घण्टा बन्द गर्न लागिएकाे हाे । 

मुस्ताङका सहायक प्रमुख जिल्ला अधिकारी रामचन्द्र ढकालले आजदेखि आउँदाे चैत १५ गतेसम्म सडक दैनिक बिहान ९ बजेदेखि ११ बजेसम्म र दिउँसो २ बजेदेखि ५ बजेसम्म बन्द हुने जानकारी दिनुभयाे । 

कालीगण्डकी करिडोरको यस सडक खण्ड हिमालपारिको जिल्ला मुस्ताङलाई सडक मार्गबाट जोड्ने एक मात्र सडक हो । यसअघि पनि मुस्ताङको थासाङ गाउँपालिका–४ मा भिरको कडा चट्टानलाई नेपाली सेनाले विस्फोटक पदार्थको प्रयोग गरी सडक चौडा गर्ने काम गर्न फागुन १५ गतेसम्म दैनिक ४ घण्टा सडक बन्द गरिएको थियो।

'आजदेखि चैत १५ गतेसम्म विस्फोटक पदार्थको प्रयोग गरेर कडा चट्टान फुटाउनुपर्ने भएको छ । यो अवधिमा बिहान ९ बजेदेखि ११ बजेसम्म र दिउँसो २ बजेदेखि ५ बजेसम्म सबै प्रकारका गाडी आवागमन बन्द हुने छन्' उहाँले भन्नुभयो।

आवश्यक सहयोगको लागि जिल्ला प्रहरी कार्यालय मुस्ताङ, प्रहरीचौकी घाँसा र तत्कालकाे सहयोगको लागि इलाका प्रहरी कार्यालय दाना म्याग्दीमा समन्वय गर्न सकिने उहाँले बताउनु भयाे ।