लमजुङ – गण्डकी प्रदेशकी स्वास्थ्य तथा जनसङ्ख्या मन्त्री मधुमाया अधिकारी गुरुङले प्रदेशमा रहेका एम्बुलेन्स सेवालाई व्यवस्थित र सुविधायुक्त बनाउन सरकार लागिपरेको बताउनुभएको छ ।

आज सोमवार उज्यालोसँगको कुराकानीमा उहाँले प्रदेशमा रहेका ‘ग’ वर्गका एम्बुलेन्सलाई ‘ख’ वर्ग र ‘ख’ वर्गमा रहेका एम्बुलेन्सलाई ‘क’ वर्गमा ल्याउन गण्डकी प्रदेश स्वास्थ्य मन्त्रालय जुटिरहेको जानकारी गराउनुभएको हो । 

मन्त्री गुरुङले प्रदेशमा अहिले सञ्चालनमा रहेका एम्बुलेन्सहरू सुविधायुक्त नहुँदा दुर्गमका नागरिकलाई स्वास्थ्य केन्दसम्म पुर्‍याइ उपचारमा सहजीकरण गर्न नसकिएको उल्लेख गर्नुभयो ।   

‘गण्डकी प्रदेशमा विभिन्न सङ्घसंस्था, अस्पतालहरूले थुप्रै एम्बुलेन्स सञ्चालन गरिरहेका छन् । ती एम्बुलेन्सहरू ‘क’ वर्गको अर्थात् बिरामीलाई बस्दा सजिलो हुने खालका छैनन्’, उहाँले भन्नुभयो, ‘जसका कारण थुप्रै दुर्गम ठाउँका नागरिकहरूलाई सहजरूपमा स्वास्थ्य केन्द्रसम्म लगी उपचारमा सहजीकरण गर्न सकिएको छैन ।’   

प्रदेशमा रहेका एम्बुलेन्सहरूको स्तरोन्नति गर्दै एम्बुलेन्समा जीपीएस जडान गरी नागरिकलाई स्वास्थ्य सेवामा सहजता ल्याउने प्रयास भइरहेको मन्त्री गुरुङले जानकारी गराउनुभयो ।

‘मन्त्रालय एम्बुलेन्सको स्तरोन्नति गर्दै ‘क’ र ‘ख’ वर्गका एम्बुलेन्स गोरखाको चुमनव्री होस् या लमजुङको दूधपोखरी, पसगाउँ या प्रदेशको कुन दुर्गम ठाउँमा पुग्यो ? कसरी बिरामी ल्याउँदैछ ? भन्ने लगायतका जानकारी लिनका एम्बुलेन्समा जीपीएस प्रणाली जडान गरी अघि बढिरहेका छौँ । केही दिनमै यसको औपचारिक उद्घाटन गर्ने तयारीमा छौँ’, उहाँले भन्नुभयो ।