सप्तरी – दिनभर तनावग्रस्त सप्तरीको गजेन्द्रनारायण सिंह सगरमाथा अञ्चल अस्पतालको अवस्था सामान्य बन्दै गएको छ ।

रुपनी गाउँपालिका ६ का अशोक साहका १८ महिनाका छोरा आरब साहलाई सर्पले टोकेपछि गएराति अस्पताल लगिएको थियो । आफन्तले ज्युँदै रहेको बच्चालाई मृत्यु भएको घोषणा गरी पोष्टमार्टम कक्षमा राखिएको भन्दै अस्पतालमा प्रदर्शन र तोडफोड गरेका थिए ।

अस्पतालले भने उपचारमा ल्याउँदै बालक मृत रहेको दाबी गरेको छ । बालकका आफन्तले बालक जीवित रहेको दावी गरी सेनाको सर्प दंश उपचार केन्द्रमा लगेका थिए । एम्बुलेन्सबाट उपचारका लागि चोहर्बा लैजाँदै गर्दा बाटोमा नै बालकको ज्यान गएको तर अञ्चल अस्पतालमा हुँदा बालक जीवितै रहेको आफन्तको दाबी छ ।

बालकको शव अहिले अञ्चल अस्पतालमा राखिएको छ । अहिले पीडितका आफन्त, अस्पताल र जनप्रतिनिधिबीच बार्ता भैरहेको छ । आफन्तले घटनाको छानबिन हुनुपर्ने, दोषिमाथी कारबाही गर्नुपर्ने र फेरि पोष्टमार्टम गर्नुपर्ने माग राखेका छन् ।