संसद् बैठककाे आकस्मिक समयमा रित्तो बाल्टिनदेखि चट्याङसम्मका कुरा

असार ११, २०८० सोमबार १४:५:६ | रासस

काठमाण्डाै - प्रतिनिधि सभामा दाङ र बाग्लुङमा चट्याङबाट भएको जनधनको क्षति, बाढीपहिरोका घटना, सप्तरीमा अन्तरजातीय विवाहपछि उत्पन्न विवाद र जिल्ला निर्वाचन कार्यालयको खारेजीसम्बन्धी प्रश्नका विषयले प्रवेश पाएको छ । सभामुख देवराज घिमिरेले सदन प्रारम्भ भएको घोषणा गर्नासाथ आकस्मिक समय माग गर्दै सांसद दीपक गिरीले दाङ र बाग्लुङमा चट्याङबाट चार जनाको ज्यान गएको घटनाबारे बैठकलाई जानकारी गराउनुभयो ।

उहाँले दाङमा दुई दिनअघि किसान रामनारायण चौधरी र समीर केसीको चट्याङबाट ज्यान गएकाे तथा रुपा राना घाइते भएको जानकारी दिँदै पीडित प्रतिपरिवारलाई १० लाख रुपैयाँ राहत उपलब्ध गराउन माग गर्नुभयो ।

केही दिनअघि बाग्लुङमा दुई जना बालक दिनेश विक र सुनिता विकको पनि चट्याङबाट ज्यान गएकाे थियाे । हरेक वर्ष चट्याङका कारण ज्यान गइरहेकाे तथा अघल्लो वर्ष ५५ जनाको चट्याङबाट ज्यान गएकाे र एकसय ४४ जना घाइते भएका तथ्याङ्क सदनलाई उहाँले जानकारी गराउनुभयो ।

अहिले सरकारले प्रतिमृतक परिवारलाई क्षतिपूर्ति र राहतबापत दुई लाख रुपैयाँ उपलब्ध गराउँदै आएको छ । वर्षातसँगै देशका विभिन्न भागमा भएको बाढी, पहिरो, चट्याङ र सडक दुर्घटनामा प्रदेशमन्त्री लगायत ज्यान गुमाएका सबै परिवारजनप्रति उहाँले श्रद्धाञ्जली व्यक्त गर्नुभयो ।

सांसद रघुजी पन्तले प्रहरी, प्रशासन र अदालत समेतले आवश्यक ध्यान नपुर्याउँदा सप्तरीमा एक जोडी युवायुवती अन्तरजातीय प्रेम विवाह गरिएकै कारण समस्या झेल्न बाध्य बनाइएको घटना सुनाउनुभयो ।

प्रेममा रहेका युवायुवतीमध्ये कथित माथिल्लो जाति समुदायबाट नक्कली नयाँ जन्म दर्ता बनाइ छोरीलाई नाबालक तुल्याएर केटा पक्षलाई दुःख दिने काम भएको जनाउँदै उहाँले भन्नुभयो, 'यस घटनामा प्रहरी, प्रशासन, अदालतले पनि ध्यान नपुर्याएको देखिन्छ ।'

अन्तरजातीय विवाहपछि उत्पन्न घटनालाई न्यूनीकरण गर्न समाजमा जनचेतना अभिवृद्धि गर्ने कार्यमा राजनीतिक दलले आवश्यक ध्यान नपुर्याएको भन्दै नेता पन्तले दोषीलाई कारबाहीको माग गर्नुभयो ।

सांसद पूर्णबहादुर घर्तीले मनसुन आगमनसँगै देशका विभिन्न भागमा बाढी, पहिरोले क्षति पुर्याएको जानकारी दिँदै पुल र सडकमा क्षति पुर्याउनुका साथै बस्ती जोखिममा पारेको बताउनुभयो ।

सांसद सन्तोष परियारले आउँदाे आर्थिक वर्षको बजेट तथा नीति कार्यक्रममा जिल्ला निर्वाचन खारेज गर्ने निर्णयले लोकतन्त्रलाई बलियो तुल्याउन नसक्ने तर्क गर्नुभयो । उहाँले भन्नुभयो, 'एउटा मात्र राजनीतिक दलको आन्दोलनले लोकतन्त्र स्थापना गरेको होइन, याे कार्यालय सीडीयो मातहत राख्दा लोकतन्त्र अप्ठ्यारोमा पार्छ । निर्णयलाई सच्याउन आवश्यक छ ।'

सांसद धनबहादुर बुढाले से–फोक्सुण्डो क्षेत्रमा रहेको गुम्बाबाट करोडौँ मूल्य बराबरको पुराना गरगहना चोरी भएकाले त्यसको खोजी गर्न सरकारको ध्यानाकर्षण गराउनुभयो ।

सांसद अब्दुल खानले जन्मसिद्धलाई नागरिकता प्रदान गर्ने विषयलाई सरल र सहज बनाउन माग गर्नुभयो ।

सांसद रमा कोइरालाले संसद् भवनको मूलद्वार नजिक सधैँभरि रित्ता बाल्टिन देख्न परेको र त्यसले सुरुमै 'अशुभ' को लक्षण दिने गरेकाले त्यसको व्यवस्थापन गर्न सुझाव दिनुभयो ।

संसद् भवनको एक पाखामा पानी चुहिने भएकाले पानी थाप्न ती बाल्टिन प्रयोग भएको हुनसक्ने बताउँदै उहाँले राज्यको महत्त्वपूर्ण पूर्वाधारका रुपमा रहेको यस भवनको संरक्षणका लागि विशेष ध्यान पुर्याउन सरकारको ध्यानाकर्षण गराउनुभयो ।

अन्तिम अपडेट: पुस १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

संसद् बैठककाे आकस्मिक समयमा रित्तो बाल्टिनदेखि चट्याङसम्मका कुरा

तस्बिर : रासस

तपाईको प्रतिक्रिया