काठमाण्डाै - नक्कली भुटानी शरणार्थी प्रकरणमा असार २८ गते पक्राउ परेर हिजाे जिल्ला अदालत काठमाण्डाैको आदेशमा रिहा भएका केशव तुलाधर पुनः पक्राउ परेका छन् ।

ललिता निवासको सरकारी जग्गा हिनामिना प्रकरणमा काठमाण्डाै असनका तुलाधरको संलग्नता देखिएका कारण पक्राउ गरिएको जिल्ला प्रहरी परिसर काठमाण्डाैका प्रमुख तथा प्रहरी वरिष्ठ उपरीक्षक दानबहादुर कार्कीले बताउनुभयो ।

उहाँले भन्नुभयो, 'भुटानी शरणार्थी प्रकरणमा पक्राउ परेका तुलाधर हिजाे १५ लाख रुपैयाँ धरौटीमा छुटेका थिए, ललिता निवासको सरकारी जग्गा हिनामिना प्रकरणमा उनको संलग्नता देखिएपछि हामीले पक्राउ गरेका छौँ।'

पक्राउ परेका तुलाधरलाई अहिले जिल्ला प्रहरी परिसर काठमाण्डाैमै राखिएको र साेमवार आज केन्द्रीय अनुसन्धान ब्युरो (सीआईबी) लाई आवश्यक अनुसन्धानका लागि बुझाइने प्रमुख तथा प्रहरी वरिष्ठ उपरीक्षक कार्कीले जानकारी दिनुभयो ।

नक्कली भुटानी शरणार्थी प्रकरणमा फरार रहेका भन्दै यही असार २८ गते उनलाई काठमाण्डाै उपत्यका अनुसन्धान कार्यालयको टोलीले काठमाण्डाैकाे सानो भर्याङबाट पक्राउ गरेको थियो ।