दार्चुला – दार्चुलाको अपि हिमाल गाउँपालिकामा भोलि साेमवारदेखि आउँदो बुधवारसम्म पालिकाभरिका सरकारी तथा गैरसरकारी कार्यालयलगायत शैक्षिक संस्थाहरूमा सार्वजनिक बिदा दिइएको छ ।

पालिकाले आज आइतवार एक सूचना निकालेर गाउँपालिकाको प्रख्यात धार्मिक सुर्मा भवानी मन्दिरमा भइरहेको बिरे जात्राको अवसरमा सार्वजनिक बिदा दिने निर्णय गरेको जनाएको छ ।

देशकै सबैभन्दा लामो समयसम्म मनाइने सुर्मा भवानीको विधिवत् रूपमा जात्रा हिजो शनिवारदेखि शुरु भएको हो । दार्चुला र बझाङ जिल्लाको सीमा क्षेत्रमा यो जात्रा लाग्ने गरेको छ ।

बझाङका सिकारीले लखेट्दा सुर्मा भवानी सुर्मा तालमा बिलय भएको मान्यता रहिआएको छ । सुर्मा तालमा अपि हिमालको खण्डेश्वरीबाट जाने तीर्थालुहरूले पूजा गरेपछि मात्रै बझाङबाट आउने तीर्थालुहरूले पूजा गर्ने चलन रहेको स्थानीय कमलसिंह धामी बताउनुहुन्छ ।

सुर्मा सरोवर तीर्थ जाने व्रतालु भक्तहरूलाई बिरे भनिन्छ । बिरे दुई प्रकारका हुन्छन् । पहिलो पटक सुर्मा सराेवर तीर्थ जानेलाई बालो बिरे र पटक–पटक गएकालाई बुढो बिरे भन्ने चलन छ ।

तस्बिर साैजन्य : हेम बाेहरा