कालीकोट – कर्णाली प्रदेशका हिमाली जिल्लामा टेलिफाेन तथा इन्टरनेट सेवा अवरुद्ध भएको छ ।

शनिवार रातिदेखि भइरहेकाे हिमपातका कारण दैलेख, कालीकोट, जुम्ला, मुगु, हुम्ला, डोल्पालगायतका जिल्लाहरूमा टेलिफाेन (ल्यान्डलाइन, माेबाइल) तथा इन्टरनेट सेवामा समस्या आएको नेपाल टेलिकम कर्णाली प्रादेशिक कार्यालय सुर्खेतका प्रमुख उमेश शाहले बताउनुभयो ।

छिनछिनमा टेलिफोन तथा इन्टरनेट सेवा आउने जाने भइरहेको छ । सुर्खेतदेखि दैलेख, कालीकोट हुँदै जुम्ला पुर्‍याइएको अप्टिकल फाइबरमा समेत समस्या आएको छ । टेलिफोन टावर रहेका धेरै ठाउँहरूमा हिउँ जमेका कारण सेवा प्रवाहमा समस्या आएको र सुधारका लागि पहल भइरहेको प्रमुख शाहले बताउनुभयो ।

कर्णाली प्रदेशका धेरैजसाे टलिफोन टावरहरू साैर्य प्रणालीबाट सञ्चालनमा छन् । हिउँद र बर्खायाममा पानी पर्दा तथा हावाहुरी चल्दा यस क्षेत्रमा टेलिफोन तथा इन्टरनेट सेवा अवरुद्ध हुने गरेकाे छ ।