प्रहरीले एकतर्फी गोली चलायो, सुरक्षा निकायमाथि गोली चलाउने पार्टीको नीति छैन : विप्लव समूह

चैत ७, २०७५ बिहीबार १९:५६:३ | उज्यालो सहकर्मी

काठमाण्डौ – नेत्रविक्रम चन्द नेतृत्वको नेकपाले वर्तमान सरकार सामाजिक फासीवादतर्फ गैरहेको आरोप लगाएको छ ।

आफ्नो पार्टीका गतिविधिमाथि प्रतिबन्ध लगाउने नाममा देशमाथि नै सरकारले प्रतिबन्ध लगाउनु गलत भएको नेकपाका मध्य केन्द्रीय कमाण्डका इञ्चार्ज सुदर्शनद्वारा सार्वजनिक प्रेस विज्ञप्तिमा उल्लेख गरिएको छ । पार्टीका गतिविधिमाथि प्रतिबन्ध लगाएसँगै आफ्ना पोलिटब्यूरो सदस्य मोहन कार्की ‘जीवन्त’ सहित दर्जनौँ कार्यकर्ता पक्राउ परेको पनि विज्ञप्तिमा जनाइएको छ ।

साथै मंगलबार काभ्रेपलाञ्चोकको रोशी गाउँपालिकाको काफलडाँडामा संगठन सुदृढीकरणका क्रममा रहेका बेला आफ्ना कार्यकर्ताहरु विशाल तामाङ, नुमबहादुर विक, शिव धिमाल र दीपेन्द्र राईलाई प्रहरीले पक्राउ गरेको आरोप पनि नेकपाले लगाएको छ ।

सुदर्शनद्वारा सार्वजनिक विज्ञप्तिमा उनीहरुले प्रहरीमाथि गोली चलाएको भन्ने आरोप झुटो भएको पनि बताइएको छ । अहिले प्रहरी तथा कुनै पनि सुरक्षा निकायमाथि गोली चलाउने पार्टीको नीति नरहेको पनि विज्ञप्तिमा उल्लेख छ । प्रहरीले एकतर्फी गोली चलाएर जवाफी कारबाही भनेर झुट फैलाएको पनि नेकपाले आरोप लगाएको छ ।

तर प्रहरीले भने माथि उल्लेखित नेकपाका कार्यकतालाई नख्खुलगायतका काठमाण्डौका विभिन्न ठाउँमा बम विस्फोट गराउँदै हिँडेकाले पक्राउ गरिएको बताएको छ । विशेष सूचनाका आधारमा महानगरीय अपराध महाशाखाबाट खटिएको प्रहरी टोलीले दाङको तुल्सीपुरका नुमबहादुर विक, भोजपुरको टेम्केमैयाका डिकेन्द्र राई, झापाको मेची नगरपालिका–३ का शिव धिमाल र सिन्धुपाल्चोकको जुगल गाउँपालिका–६ का विशाल तामाङलाई मंगलबार काभ्रेबाट पक्राउ गरेको जनाएको छ ।

उनीहरुले एक जनाको मृत्यु र दुई जना घाइते हुने गरी गएको फागुन १० गते ललितपुरको नख्खुस्थित एनसेल कार्यालय अगाडि बम विस्फोट गराएको पनि प्रहरीले जनाएको छ । साथै त्यसै समूहले गएको फागुन २४ गते तीन जना घाइते हुने गरी काठमाण्डौको वसुन्धराका रोहन गुरुङको घरमा बम विस्फोट गराएको महाशाखाका निमित्त प्रमुख केदार ढकालले जानकारी दिनुभयो ।

विक र राईलाई काठमाण्डौबाट तथा धिमाल र तामाङलाई काभ्रेबाट पक्राउ गरिएको हो । काभ्रेमा लुकीछिपी बसेको सूचनाका आधारमा खोजतलासका क्रममा मङ्गलबार त्यही गाउँपालिका–२ काफलडाँडाबाट धिमाल र तामाङलाई पक्राउ गरिएको हो ।

नियन्त्रणमा लिन खोज्दा त्यस समूहले प्रहरीमाथि गोली प्रहार गरेपछि आत्मरक्षाका लागि प्रहरीले चार राउण्ड गोली फायर गरेको ढकालले बताउनुुभयो ।घटनास्थलबाट विभिन्न कम्पनीको ६ थान मोबाइल, चार्जर, पिलास र विभिन्न पुस्तक बरामद गरेको पनि प्रहरीले जनाएको छ ।

तर सुदर्शनद्वारा सार्वजनिक विज्ञप्तिमा भने नख्खुमा रहेको एनसेलको मुख्य कार्यालय अगाडि भएको बम विस्फोट र अन्य विस्फोटका बारेमा केही उल्लेख गरिएको छैन ।

अन्तिम अपडेट: माघ १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

प्रहरीले एकतर्फी गोली चलायो, सुरक्षा निकायमाथि गोली चलाउने पार्टीको नीति छैन : विप्लव समूह

फाइल फाेटाे

तपाईको प्रतिक्रिया