गौतम बुद्ध अन्तर्राष्ट्रिय विमानस्थल प्राधिकरणले नै चलाउने, अन्य विकल्प पनि खुला

चैत १७, २०७५ आइतबार १७:५१:२७ | अर्जुन पोख्रेल

गौतमबुद्ध अन्तर्राष्ट्रिय विमानस्थल नेपाल नागरिक उडड्यन प्राधिकरण क्यानले नै चलाउने भएको छ ।

विमानस्थलको निर्माण कार्य अन्तिम चरणमा पुग्दा पनि कसले चलाउने भन्ने कुराको टुंगो नलागेको भन्दै अन्योला भैरहेका बेला नागरिक उडड्यन प्राधिकरणले भने आफैं चलाउने बताएको हो ।

‘हामीले सन् २०१९ भित्रै विमानस्थल चलाउने भनेका छौं, अहिलेसम्म मोडल पनि टुंगो लागेको छैन, मोडल टुंग्याएर विदेशी कम्पनीलाई बोलाएमा धेरै समय लाग्न सक्छ, त्यसैले सुरुमा भैरहवा अन्तर्राष्ट्रिय विमानस्थल हामीले नै चलाउने तयारी गरेका छौं’ नागरिक उडड्यन प्राधिकरणका महानिर्देशक सञ्जिव गौतमले उज्यालो अनलाइनसँग भन्नुभयो ।

‘अहिले सबै प्रक्रिया हेर्दा यसै वर्ष नै विदेशी आएर चलाउन सक्ने सम्भावना देखिँदैन, त्यसैले अहिले हामीले त्रिभुवन अन्तर्राष्ट्रिय विमानस्थल जसरी चलाएका छौं, त्यसरी नै भैरहवा पनि चलाउने तयारी छ’ महानिर्देशक गौतमले थप्नुभयो ।

अर्थ मन्त्रालयले विदेशको प्रतिष्ठित र अनुभवी कम्पनीसँग जीटूजी (सरकारी–सरकारी) अथवा पीपीपी (सार्वजनिक निजी साझेदारी) जुन मोडलमा भए पनि सम्झौता गर्न संस्कृति पर्यटन तथा नागरिक उडड्यन मन्त्रालयमार्फत क्यानलाई पत्राचार गरेको थियो ।

अर्थ मन्त्रालयले भनेअनुसारको प्रस्ताव तयार पारेर क्यानले सैद्धान्तिक स्वीकृतिका लागि मन्त्रीपरिषद्मा पठाएको छ । क्यानको फाइल निर्णयको पर्खाईमै छ ।
‘विमानस्थल सञ्चालन र व्यवस्थापनको लागि विदेशी कम्पनीसँग सम्झौता गर्न सकिने कुरा समेटेर मन्त्रीपरिषद्लाई पठाएको प्रस्ताव पर्खाइमै छ, तर यो प्रक्रिया लामो हुने भएकोले हामीले नै विमानस्थल चलाउने तयारी गरिरहेका हौं ।’ उहाँले भन्नुभयो

काम अन्तिम चरणमा, केही दिनमै उपकरण आयात सुरु हुने

गौतम बुद्ध अन्तर्राष्ट्रिय विमानस्थलको काम अन्तिम चरणमा पुगेको छ । धावनमार्ग, टर्मिनल भवन, कन्ट्रोल टावरलगायतका संरचनाको काम तीव्र गतिमा भैरहेको छ । तीन किलोमिटर लामो धावनमार्गको तीन तहको काम सकिएर चौथो तहको काम सुरु भइसकेको छ । अबको ३० दिनमा धावमार्ग, ट्याक्सी वे र पार्किङ वे को काम सकिने आयोजनाले जनाएको छ ।

‘उडान तथा अवतरणमा प्रयोग हुने विभिन्न उपकरणको टेन्डरको काम सकिएको छ, अब केहि दिनमा उहाँहरुले सामान आयात सुरु हुनेछ’ नागरिक उडड्यन प्राधिकरणका महानिर्देशक सञ्जिव गौतमले उज्यालो अनलाइनसँग भन्नुभयो, ‘२०१९ भित्र नै अन्तर्राष्ट्रिय उडान सुरु गर्ने गरी काम भैरहेको छ ।’

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

अर्जुन पोख्रेल

उज्यालोमा कार्यरत अर्जुन पोख्रेल आर्थिक विषयमा कलम चलाउनु हुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्