सुदूरपश्चिम प्रदेश सरकारको नीति तथा कार्यक्रम सार्वजनिक

जेठ १९, २०७६ आइतबार १८:५५:३० | उज्यालो सहकर्मी

कैलाली - सुदूरपश्चिम प्रदेश सरकारले आगामी आर्थिक वर्ष २०७६-०७७ को नीति तथा कार्यक्रम सार्वजनिक गरेको छ ।

सुदूरपश्चिम प्रदेश प्रमुख मोहनराज मल्लले चौथो अधिवेशनको दशौं बैठकमा प्रदेश सरकारको नीति तथा कार्यक्रम प्रस्तुत गर्नुभएको हो । सरकारले आइतबार सार्वजनिक गरेको नीति तथा कार्यक्रममा कृषि, जडिबुटी, जलस्रोत र पर्यटनको उचित व्यवस्थापन र परिचालन गरी प्रदेशको विकास र समृद्धिको ढोका खोल्ने नीति लिइएको छ ।

प्रस्तुत नीति तथा कार्यक्रममा समाजवाद उन्मुख अर्थतन्त्रको प्रवर्द्धनका लागि लगानीमैत्री वातावरण सिर्जना गरी सार्वजनिक, निजी, सहकारी तथा सामुदायिक क्षेत्रको सहभागितालाई प्रोत्साहन गर्ने, बैंक तथा वित्तीय संस्था स्थापना गर्ने र पहुँच बढाउने, प्रदेश लगानी बाेर्डको स्थापना गर्ने, रोजगारीका अवसर सिर्जना गर्दै कूल गार्हस्थ उत्पादनमा योगदान दिने, लगानीको वातावरण बनाइ दिगो विकास हासिल गर्ने उल्लेख गरिएको छ ।

एकीकृत बस्ती विकास कार्यक्रम, एक स्थानीय तह एक औधोगिक क्षेत्र, लगानी सम्मेलनको आयोजना, एक जिल्ला एक नमुना शहर, साहसिक पर्यटन प्रवर्द्धन, होमस्टे सञ्चालन, बन्द विमानस्थल सञ्चालन तथा चालुको स्तरोन्नति, अञ्चल अस्पताललाई प्रादेशिक अस्पताल बनाउने र जिल्ला अस्पताललाई स्तरोन्नति गरिने कार्यक्रममा जाेड दिइएकाे छ ।

साथै जडिबुटीको व्यावसायिकरण तथा बजारीकरण गर्दै आय आर्जनमा वृद्धि गरिने, धार्मिक, संस्कृतिक तथा पर्यटकीय क्षेत्रहरूको संरक्षण सम्बर्द्धन गर्दै आवश्यक पूर्वाधार जुटाउन नीति योजना बनाउने लगायतका विषयमा पनि नीति तथा कार्यक्रममा जोड दिइएको छ ।

यसैगरी प्रदेशका लागि पदक जितेका खेलाडीलाई जीविकोपार्जनका लागि खेलाडी कल्याणकारी कोषको स्थापना, प्रदेशका लागि पदक जित्ने खेलाडीलाई सम्मान गरिने, साहसिक खेलहरुको सम्भाव्यता अध्ययन गरिने, मुख्यमन्त्री कपलाई निरन्तरता दिने, फाप्लालाई बहुउद्देश्यीय रंगशालाका बनाउने, एक निर्वाचन क्षेत्र एक खेल मैदान कार्यक्रम सञ्चालन गर्ने, प्रदेश स्पोर्टस एकेडेमीको स्थापना गर्ने कुरालाई निति तथा कार्यक्रममा समावेश गरिएको छ ।

युवा रोजगारी सिर्जना गरी गरिबी निवारणका लागि कार्यक्रम सञ्चालन गर्ने, कुप्रथा हटाउन अभियान चलाइने, विशेष कार्यक्रम सञ्चालन गरी चेलीबेटी तथा बालबालिका बेचबिखन, मानव ओसारपसार कार्य रोक्ने, विपन्न थारु समुदायको हितका लागि आवश्यकता पहिचानका आधारमा एकीकृत विकास कार्यक्रम सञ्चालन गरिने र यो समुदायका व्यक्तिमा लाग्ने ‘सिकलसेल‘ रोगको उपचार र निदानको लागि विशेष कार्यकम ल्याइने कुरालाई निरन्तरता दिइएको छ ।

यसैगरी, बजेट कार्यक्रम कार्यान्वयनका लागि आवश्यक संयन्त्रको सुनिश्चितता गरिने, सबै प्रकारका भेदभावको अन्त्य गरी सामाजिक न्याय, मानव अधिकार संरक्षण र सम्बर्द्धनकाे सुनिश्चितता गरिने, लैङ्गिक हिंसा शून्य सहनशीलताको नीति लिइने तथा समावेशी आर्थिक विकास गर्ने नीति तथा कार्यक्रममा उल्लेख छ ।

प्रदेशमा सञ्चालनमा रहेमा योजनाहरुको परियोजना बैंक स्थापना गर्ने, प्रदेशलाई तीन वर्षभित्र साक्षर प्रदेश बनाइने, सुचना प्रविधि पार्क स्थापना गर्ने, सूचना प्रविधिको एकीकृत विकास गर्ने, वैदेशिक रोजगारीबाट फर्किएकाहरुको ज्ञान सीपको प्रयोग गर्ने, भारत जानेहरुको बीमा गराउने लगायतका योजनाहरु नीति तथा कार्यक्रममा समावेश गरिएको छ ।

कृषि क्षेत्रको विकासका लागि ‘परिवर्तित कृषि प्रणाली, मौसम सुहाउँदो खेती, माटो सुहाउँदो उत्पादन, उत्पादन अनुसारको बजार‘ भन्ने नारा सहित कृषिको आधुनिकीकरण गर्ने, नमुना कृषि गाउँ आफैं बनाउँ कार्यक्रम सञ्चालन गर्ने, एक घर एक नल नारासहित कृषि उपजको बजारीकरणका लागि पहल गर्ने, आवश्यक मल, बीउबिजन र पूर्वाधारको विकास गर्ने प्रदेश सरकारको निति तथा कार्यक्रम समावेश गरिएकाे छ ।

अन्तिम अपडेट: माघ ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्