लगातारको वर्षाले चैनपुरका केही घर पहिरोको उच्च जोखिममा

असार २९, २०७६ आइतबार १५:५८:५ | नवीन गुरुङ

संखुवासभा - लगातारको वर्षाका कारण संखुवासभाको चैनपुर नगरपालिका-४ मा रहेकाे पोखरीबजार नजिकैका ४ घर पहिरोको उच्च जोखिममा परेका छन् ।

केही दिनदेखि परेको अविरल वर्षाले स्थानीय लिलाबहादुर कार्की, बर्तबहादुर राई, फुर्वा शेर्पा र पदमबहादुर राईको घर पहिरोको उच्च जोखिममा परेका हुन् । उनीहरुकाे घरमुनिबाट पहिरो झर्न थालेपछि घर नै तान्ने हाे कि भन्ने डर फैलिएकाे छ।

पहिरोले तान्न लागेको ४ घरमध्ये स्थानीय पदमबहादुरको घर मात्र पक्की छ भने अरु ढुङ्गा माटो र फुसको छानो भएका घर छन् । घरमुनिबाट पहिरो खस्न थालेपछि रातभर निन्द्रा नै लाग्न छोडेको पदमबहादुरले बताउनुभयो । ‘राति निदाएको बेला कतिबेला घरसहित हामीलाई बगाउने हो भनेर निन्द्रा नै लाग्न छोडेको छ । रातभर जाग्राम बसिरहेको छु । दिन दिनै तलबाट पहिरो झरिरहेको छ । सरकारले रोकथाम गरिदिए हुन्थ्याे’, उहाँले भन्नुभयो ।

पहिरोले घर तान्न थालेपछि नेपाल रेडक्रस सोसाइटी चैनपुर उपशाखाले वितरण गरेको त्रिपालले पहिरो गएको ठाँउमा माथिबाट छोपिएको स्थानीय पदमबहादुरले बताउनुभयो । उहाँले त्रिपालले छोपेर मात्र घरहरु जोगाउन नसकिने हुँदा पहिरोको जोखिममा रहेका उक्त घरहरुलाई संरक्षणको लागि तलबाट जालीसहितको गारो लगाउनु पर्ने र आफूहरुलाई वैकल्पिक ब्यबस्थापनका लागि सहयोग गर्नु पर्ने माग गर्नुभयो ।

घर नजिकैबाट खनिएको मोटर बाटो, कमजोर भू–बनावट र बर्खाको समयमा केहीदिन अघिदेखि परेको अविरल वर्षाका कारण ती घरहरु पहिरोको उच्च जोखिममा परेको स्थानीय मोहनकुमार राईले बताउनुभयो । उहाँले पहिरोको रोकथाम र संरक्षणको लागि सम्बन्धित निकायले बेलैमा ध्यान पुर्‍याउनु पर्ने समेत बताउनुभयो ।

ती ४ घर नै पहिरोले बगाउने खतरा भएकाले स्थानीय सरकारले सक्दो सहयोग गर्नु पर्ने र तत्काललाई वैकल्पिक व्यवस्थापन गर्नुपर्ने चैनपुरका कुमारबाबु अधिकारीले बताउनुभयो । उहाँले दीर्घकालीन सोचका साथ विकासका संरचनाहरुमा ध्यान नपुर्‍याउँदा जोखिम निम्तिने खतरा बढ्ने भएकाले विकास निर्माण र संरचना तयार गर्दा ध्यानु दिनुपर्नेमा जोड दिनुभयो ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नवीन गुरुङ

संखुवासभाका पत्रकार नवीन गुरुङ उज्यालोका जिल्ला सम्बाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्