मनाङले बारम्बार बोलाउँछ, बाटोले झस्काउँछ !

असार ३२, २०७५ सोमबार १५:४४:५९ | श्यामशितल परियार

लमजुङ– ‘प्रकृतिले फुसर्दमा सिगाँरेको’ हिमाली जिल्ला मनाङ पुग्ने मनभरी धोको थियो, तार्कुघाटकी प्रतिभा रानाभाटको ।

तनहुँ भानु नगरपालिकाको पुरानो डिही प्राथमिक स्वास्थ्य केन्द्रमा काम गर्ने उहाँको मनमा मनाङ पुग्ने धोको भए पनि समय नमिल्दा उहाँ मनाङको साइतमा निस्कन सक्नुभएको थिएन । तर मनबाट मनाङ जाने रहर भने हटेको थिएन । गएको बिहीबार उहाँलाई मनाङ जाने साइत जुर्‍याे।

धेरै सुनेको, पढेको, पत्रपत्रिका, टेलिभिजनमा देखिएको, मनैले खाएको सुन्दर ठाउँ मनाङको साइतमा हिँड्दै गर्दा कत्तिबेला ‘मनाङ पुगूँला र आफ्नै आँखाले मनाङको सौन्दर्यलाई चुमाैँला’ भन्ने चाहले उहाँमा खुशीको सीमा नै थिएन ।

बिहान साढे ९ बजे उहाँ जिल्ला जनास्वास्थ्य कार्यालय मनाङमा कार्यरत साथी दीपक बम्जन, सुरज अधिकारीसँगै ‘बोलेरो’ गाडी चढेर बेसीशहरबाट उहाँ मनाङको यात्रामा निस्कनुभयो ।

गाडीबाट सजिलैसँग उहाँ बेसीशहरबाट ङादीसम्म पुग्नुभयो । कच्ची, साँघुरा, हिलाम्य बनेको सडकमा गाडीको यात्रा गर्दा घरीघरी डरले उहाँको मुटु काँप्थ्यो । ‘साँघुरा, कच्ची, बर्खाको समय, पानी परेकाले बाटो हिलो भएको थियो । जोखिमपूर्ण बाटो पार गर्दैगर्दा मनमा कताकता डर त हुन्थ्यो । तर मनाङ पुग्ने धोकोले डरलाई पछि धकेल्थ्यो’, उहाँले भन्नुभयो ।

बाटो पार गर्दै उहाँ म्यार्दीखोला पुग्नुभयो । म्यार्दीखोला उर्लिएर आएको थियो, खोला पार गर्नै डर लाग्ने गरी ।

प्रतिभाका अनुसार सवारी आवागमनका लागि खोलामा पक्की पुल छैन । प्रतिभासँगै गाडीमा सवार अन्य यात्रु पनि गाडीबाट ओर्लिए । कच्ची पुलको माध्यमबाट उनीहरुले खोला पार गरे । चालकले जोखिम मोलेरै उर्लिएको खोलामा गाडी हुँइक्याए । गाडीले खोला पार गरेपछि उनीहरु गाडीमै बसे । र यात्रालाई निरन्तरता दिए । ‘म्यार्दी खोलामा पुल निर्माण भइरहेको छ,’ उहाँले भन्नुभयो ।

सानाठूला खोला पार गर्दै उनीहरु तिमाङखोला पुगे । तिमाङखोला पुग्दा साँझ परिसकेको थियो । तिमाङखोलामा पनि भेल उर्लिएर आएको थियो । तिमाङखोलामा भने चालकले गाडी हुँइक्याउँने आँटै गरेनन् । प्रतिभाले हिँड्ने सुर गर्नुभयो ।

हिँडेरै उहाँ तिमाङगाउँसम्म पुग्नुभयो । उहाँलाई लिनका लागि आफ्नो साथी बाइक लिएर आएका थिए, तिमाङगाउँमै ।

‘डराउँदै डराउँदै तिमाङखोलासम्म गाडीमै गइयो । साँझ भैसकेको थियो । खोलामा पानीको बहाव बढेको थियो । गाडीबाटै खोला पार गर्न सम्भव भएन । त्यसैले कच्ची पुलबाट खोला पार गरेँ । हिँडेरै तिमाङ गाउँसम्म आएँ । साथीको बाइकमा चढी चामे पुगेँ,’ मनाङ जादैँ गर्दा बाटोमा भोगेको भोगाई उहाँले एकै श्वरमा सुनाउनुभयो ।

चामे पुग्दा घडीले बेलुकीको ८ बजाइसकेको थियो । त्यस दिन घुम्ने कुरै भएन । मनाङ पुगेको भोलिपल्ट शुक्रबार बिहानै उहाँ उपल्लो मनाङ, ढिकुरपोखरी, हुम्डे, टंकी मनाङ, गंगापूर्ण तालसम्म पुग्नुभयो ।

मनाङमा पाइला टेक्दा स्वर्गकै अनुभूति

‘मनाङको सौन्दर्यको त कुरै नगरौँ । यहाँ पाइला टेक्दा स्वर्गकै अनुभूति भयो’, उहाँले भन्नुभयो, ‘झन माथिल्लो मनाङको भारपाङ स्याउबारीले मनै छोयो ।’

बारीमा फल्दै गरेका स्याउले उहाँको मन लोभ्याएको हो । मनाङ पुगेर फर्कनुभएकी प्रतिभाले मुस्कुराउँदै भन्नुभयो, ‘मनाङ पुग्ने धोको पूरा भयो । फेरि समय मिलाएर मनाङ जानेछु । मनाङको बाटा सम्झिँदा भने मन झस्किन्छ । तर मनाङको सौन्दर्यले भने बारबार डाकिरहन्छ ।’

पक्की सडक र पुल नहुँदा समस्या

मनाङ आफैमा सुन्दर छ । प्रतिभाको झैँ जीवनमा एकचोटी मनाङ पुग्ने रहर जोकोहीको हुन सक्छ । बाह्य तथा आन्तरिक पर्यटकको रोजाईको पर्यटकीय गन्तव्य पनि हो, मनाङ । तर मनाङसम्म पुग्ने बाटोको अवस्था राम्रो नहुँदा, खोलाहरुमा पक्की पुल नहुँदा मनाङ जान कतिपय डराउँछन् ।

राम्रो सडक र पक्की पुलको अभावमा विश्वमा प्रसिद्धि कमाएको अन्नपूर्ण पदमार्गमा पर्ने हिमाली जिल्ला मनाङ पुग्न जोखिमपूर्ण यात्रा गर्नुपर्ने बाध्यता रहेको कतिपय पर्यटकहरु बताउने गर्दछन् ।

स्थानीय सञ्चारकर्मी नेगम परियारका अनुसार म्यार्दीखोलामा पुल निर्माण भइरहेको छ । बर्खामा पनि सवारी आवागमनका लागि पिसाङस्थित २ वटा खोलामा काठेपुल बनाइएको छ । पक्की पुल निर्माण गर्नुका साथै बाटोको स्तरोन्नति गर्न सके बाह्रै महिना मनाङसम्म आउने पर्यटकको संख्यामा भारी वृद्धि हुन सक्ने नेगमले बताउनुभयो ।

बर्खामा पर्यटकको संख्यामा कमी

परियारका अनुसार बर्खाको समयमा मनाङसम्म पुग्ने पर्यटकको संख्या कम छ । हिउँदमा दैनिक झण्डै एक सय २० सवारी आवतजावत गर्ने मनाङमा बर्खामा मुश्किलले ९-१० वटा सानो जीप मात्रै चल्ने गरेका छन् ।

‘सिजनमा त यहाँ थुप्रै पर्यटक आउँछन् । अहिले बर्खाको समय छ । सवारी पनि त्यति धेरै चल्दैनन् । यहाँ आउने पर्यटकको संख्या अहिले कमै छ,’ उहाँले भन्नुभयो ।

उहाँका अनुसार बर्खाको समय भए पनि तिमाङखोलादेदेखि चामे, पिसाङ, माथिल्लो मनाङ र खाङ्सरमा भने सवारी साधन मज्जाले नै चलेका छन् ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्