बझाङ पहिरो : ६ जना मृत भेटिए, फेरि पहिरो खस्ने डर

असार २१, २०७७ आइतबार ८:३३:४ | डीबी बिष्ट

बझाङ – शनिबार राती १ बजे केदारस्युँ गाउँपालिका–८ को मल्लेसीमा गएको पहिरोमा परेर एकै परिवारका चार सहित ६ जनाले ज्यान गुमाएका छन् भने एक जना अझै बेपत्ता छन् ।

पहिरोले २० घर पूर्ण रुपमा बगाएको र दुई घरमा क्षति पुर्याएको छ । पहिरोका कारण अरु ४५ घर जोखिममा पर्नुका साथै गाउँका करिब चार सय जना पूर्ण रुपमा विस्थापित भएको केदारस्युँ गाउँपालिका–८ का वडाध्यक्ष गणेश बोहोराले बताउनुभयो ।

पहिरोमा पुरिएका ४१ वर्षीया राममती जेठारा, उहाँका ११ वर्षीया छोरा प्रयाग जेठारा र दुई छोरीहरु १६ वर्षिया शान्ति र ७ वर्षकी अस्मिताको शव फेला परेको छ । १५ वर्षीया सन्तू जेठाराको पनि शव भेटिएको छ । यस्तै ८० वर्षीय दले जेठाराको पनि ज्यान गएको छ । यस्तै गिरिजा जेठारा शनिबार साँझसम्म बेपत्ता भएकाले उहाँको खोजी भैरहेको छ । राममतीका श्रीमान कटे जेठारा भने रोजगारीका लागि भारतमा हुनुहुन्छ ।

जिल्ला सदरमुकाम चैनपुरबाट गएको डीएसपी गणेश बम सहितको नेपाल प्रहरीको टोली, डीएसपी गणेश शाहको नेतृत्वमा गएको सशस्त्र प्रहरीको टोली र कालंगा जलविद्युत आयोजनाको सुरक्षार्थ केदारस्युँकै बागथलाबाट खटिएको नेपाली सेनाको टोली र जिल्ला अस्पतालबाट डाक्टर सन्दिप ओखेडाको टोली तथा स्थानीयले बेपत्ताको खोजी गरिरहेका छन् ।

गाउँभन्दा करिब १ सय ५० मिटर माथि रहेको रातापड सामुदायिक वनबाट बीच गाउँमा पहिरो खसेको हो । सामुदायिक वनको बीचमा वर्षातमा मात्रै पानी आउने सानो मुहान छ । मुहानको पानी निकास हुने सानो खोल्सो गाउँको बीच भागबाट भएर बग्छ । त्यही खोल्सोमा डाँडाको टुप्पोबाट पहिरो खसेको र खोल्सोको निकास थुनिएर ड्याम बनेको हुन सक्ने स्थानीय जयबहामदुर जेठाराले बताउनुभयो ।

‘खोल्सोमा बनेको ड्याम एक्कासी फुटेपछि पहिरो आएको हो कि भन्ने अनुमान छ’, उहाँले भन्नुभयो, ‘सानै खोल्सो हो, त्यसरी पानी जम्मा भएर गाउँ नै बगाउला भनेर अनुमान गरेकै थिएनौं ।’

विस्थापितको बिचल्ली गाउँको मध्य भागमा पहिरो गएपछि फेरि पहिरो जान सक्ने डरले गाउँका कोही पनि आफ्नो घरमा बस्न सकिरहेका छैनन् । विस्थापित भएकाहरुलाई स्थानीय नवादेउ प्राथमिक विद्यालय र छिमेकी गाउँ घड्यानमा एक दिनको लागि व्यवस्थापन गरिएको वडाध्यक्ष गणेश बोहराले बताउनुभयो ।

उहाँका अनुसार विद्यालयमा रहेकाहरुलाई सामुहिक रुपमा खानाको व्यवस्थापन गरिएको र घड्यान गाउँमा गएकाहरुलाई त्यहाँका स्थानीयले खाना र बासको व्यवस्था गरेको छ ।

पहिरो पीडितहरुका लागि भनेर नेपाली सेनाको हेलिकप्टरबाट आठ क्विन्टल चामल, ३७ वटा त्रिपाल र ४० वटा कम्मल घटनास्थलमा पुर्याइएको प्रमुख जिल्ला अधिकारी कमलराज भण्डारीले बताउनुभयो । अझै थप राहत लिएर आइतबार जिल्ला प्रशासन कार्यालयको टोली मल्लेसी जाने उहाँको भनाइ छ ।

यस्तै गाउँपालिकाले पहिरोमा परेर ज्यान गुमाएकाहरुको लागि तत्काल किरिया खर्च बापत ३५ हजार रुपैयाँ दिने निर्णय गरेको गाउँपालिका अध्यक्ष इन्द्र भण्डारीले बताउनुभयो । आइतबार नै अर्को बैठक बसेर विस्थापितहरुलाई अन्य सहयोग गर्नेबारेमा निर्णय गरिने पनि उहाँले बताउनुभयो ।

पहिरोमा परेर २० परिवारका ११० पशुचौपाया समेत मरेका छन् ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

डीबी बिष्ट

डीबी बिष्ट बझाङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्