रुकुम पुगेर प्रचण्डकाे सङ्कल्प : ‘गल्तीकाे आत्मालोचना गर्छु, देश र नागरिकप्रति दायाँबायाँ गर्दिनँ’

चैत २४, २०७७ मंगलबार १८:४४:३९ | राजु लामिछाने

रुकुम पश्चिम – नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहालले रुकुम पुगेर विगतका केही आफ्ना कदमको आत्मालोचनासहित नयाँ सङ्कल्प गर्न नागरिक माझ आएको बताउनुभएको छ । उहाँले विगतका वाचा, प्रतिबद्धता कहिल्यै नभुल्ने बताउँदै देश र नागरिकप्रति दायाँ–बायाँ नगरेको र अब पनि नगर्ने प्रतिबद्धता जनाउनुभयो ।

‘२०७० को चुनावमा आफूमाथि बम हान्नेलाई गृहमन्त्री बनाएर, योगदान कमै भएकालाई स्थायी कमिटीमा लिएर अलिकति गल्ती गरेँ कि भन्ने लागेको छ’, उहाँले भन्नुभयो ‘तर विगतको आन्दोलनमा इमानदारिताका साथ लागेका नागरिकको साथमै लाग्ने सङ्कल्प गर्न रुकुम आएको हुँ ।’ उहाँले सहिद परिवार तथा जनयुद्धताका त्याग गर्नेहरु ओझेलमा परे कि भन्ने लागेको तर अब त्यस्तो नगर्ने बताउनुभएको छ ।

३२ औँ जनआन्दोलन दिवसको अवसरमा नेकपा माओवादी केन्द्र रुकुम पश्चिमले जिल्ला सदरमुकाम मुसिकोटमा आयोजना गरेको जन प्रशिक्षण कार्यक्रममा बोल्नु हुँदै अध्यक्ष दाहालले जन प्रशिक्षण गर्न आएको आफूले रुकुमबाट उल्टो प्रशिक्षण पाएको बताउनुभयो । अब नागरिक माझ धेरै बोल्नुभन्दा काम गर्नुपर्ने आफूले देखेको भन्दै दाहालले नागरिक आफूलाई हैन, आफू नागरिकलाई हेर्न रुकुम आएको समेत बताउनुभयो । रुकुम आएर शक्तिशाली ऊर्जासहित काठमाण्डौ फर्कने गरी प्रशिक्षित भएको समेत उहाँले जनाउनुभयो ।

अब अर्को शिराबाट जनयुद्ध हुन्छ

कार्यक्रममा उहाँले अब अर्को शिराबाट जनयुद्ध थालनी हुने बताउनुभएको छ । उहाँले हिंसाविहीन तर नयाँ क्रान्तिको सुरुवात रुकुमबाटै हुने बताउनुभयो । प्रदेश सरकारलाई अपदस्थ गर्ने कोसिस भएको बताउँदै उहाँले केही समय प्रतिपक्षमा बस्न तयार भएको र चाँडै नै नागरिकको साथले देशिय रुपमा विजयी हुने उल्लेख गर्नुभयो ।

कार्यक्रममा अध्यक्ष दाहालले जनयुद्ध र जनआन्दोलनको उपलब्धी केही व्यक्तिहरुले खतरामा पारेको आरोप लगाउनुभयो । ‘नागरिकलाई फेरि अन्याय, विभेदमा जाँतोमा पिस्ने षड्यन्त्र भयो’, दाहालले भन्नुभयो, ‘काठमाण्डौमा लडेको लडाइँले बल पुगेन, षड्यन्त्रलाई परास्त पार्ने ताकत जनयुद्धको आधारभूमिबाट खोज्न आएँ ।’

प्रचण्डको ताकत छैन भन्नेहरूलाई रुकुमेली नागरिकका बीचबाट खबरदारी गर्न चाहेको समेत उहाँले बताउनुभयो । क्रान्तिकारी नागरिकको कहिल्यै नटुङ्गिने साथ र ऊर्जाले आफूले अब थोरै समय काठमाण्डौ र धेरै समय नागरिकको बीचमा दिन चाहेकाले आफू कुनै हालतमा प्रतिगमनकारीविरुद्ध नझुक्ने प्रचण्डले बताउनुभयो ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राजु लामिछाने

राजु लामिछाने रुकुमका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्