एमालेकाे साख गिराएर ध्वस्त पार्न खाेज्ने काम भइरहेकाे छ : प्रधानमन्त्री ओली

असार १८, २०७८ शुक्रबार १६:१२:३४ | उज्यालो सहकर्मी

काठमाण्डाै – प्रधानमन्त्री केपी शर्मा ओलीले देशको प्रगतिशील शक्तिलाई कमजोर पार्ने प्रयास भइरहेको बताउनुभएको छ । शुक्रवार नेकपा एमालेको केन्द्रीय कमिटीको बैठकमा बोल्दै प्रधानमन्त्री केपी शर्मा ओलीले देशभित्रको प्रगतिशील शक्तिलाई बदनाम गर्न र कमजोर पार्नका निम्ति अनेक खालका प्रयास भइरहेको बताउनुभएको हो ।

उहाँले देशलाई अनुशासनहीन, उच्छृङ्खल र सामाजिक सभ्यताको उल्लङ्घन गरेर स्तरहीन प्रवृत्तितर्फ धकेल्न खोजिएको पनि बताउनुभयो । उहाँले भन्नुभयो, ‘अनुशासन उल्लङ्घन गर्नुलाई बहादुरी ठान्ने प्रवृत्ति, त्यस्ता कुराहरूले अहिले पनि आन्दोलनको सङ्गठित तवरले घोषणा गर्ने, निषेधाज्ञा तोड्ने, उल्लङ्घन गर्ने, हामीलाई कसले के गर्न सक्छ भन्ने खालका भावना राख्ने प्रवृत्ति बढेका छन् । र देशलाई एउटा अनुशासनहीन, उच्छृङ्खल र सामाजिक सभ्यता, मर्यादाको उल्लङ्घन गर्ने, छाडा, स्तरहीन प्रवृत्तितर्फ धकेल्न खोजिएको छ । अहिले राजनीतिक मुद्दा आफ्नो ठाउँमा छन्, राजनीतिक थलोबाट मुद्दालाई अदालततिर पठाइएको छ । नागरिकमा जान नदिने प्रयास भइरहेका छन् । ती प्रयास सँगसँगै अदालतलाई दबाब दिनका लागि र खासगरी प्रगतिशील शक्तिलाई बदनाम गर्नका लागि त्यसलाई कमजोर पार्न, त्यसलाई छिन्न–भिन्न पार्न अनेक प्रयास भएका छन् ।’

प्रधानमन्त्री ओलीले नेकपा एमालेलाई नागरिककाे बीचमा साख गिराएर ध्वस्त पार्न लागिएको पनि बताउनुभयो । उहाँले आफ्नै पार्टीको सरकार ढालेर प्रमुख प्रतिपक्षी दलको नेतृत्वमा सरकार बनाउनका लागि संसदीय अभ्यास र दलीय अनुशासनलाई समेत उल्लङ्घन गर्ने काम भएको बताउनुभयो । उहाँले भन्नुभयो, ‘हाम्रो पार्टीको साख नागरिककाे बीचमा गिराउन खोज्ने, हाम्रो पार्टीको मर्यादा ध्वस्त पार्न खोज्ने काम हुने गरेका छन् । आफ्नो पार्टीको सरकार ढाल्ने र प्रमुख प्रतिपक्षी दलका नेतृत्वमा सरकार बनाउने जस्ता लोकतन्त्र, संसदीय अभ्यास, दलीय प्रणाली, दलीय अनुशासनको उल्लङ्घन गर्ने र अराजकताको स्थिति सिर्जना गर्ने खालका काम पनि भइरहेका छन् ।’

उहाँले निषेधाज्ञालाई तोडेर राजनीतिक दलहरू पुत्ला दहनमा लागेको भन्दै असन्तुष्टि व्यक्त गर्नुभयो । प्रधानमन्त्री ओलीले राष्ट्रपति विद्यादेवी भण्डारीले आफ्नो कर्तव्य पालना गरिरहेको जिकिर गर्दै राष्ट्रपति भण्डारीमाथि निकृष्ट तहमा ओर्लिएर गालीगलौज, अपमान र झुटा लाञ्छना लगाएर समाजलाई असभ्य बनाउन खोजिएको बताउनुभयो ।

यसैबीच केन्द्रीय कमिटीकाे बैठक भाेलि दिउँसाे बज्ने गरी स्थगित भएकाे छ ।

अन्तिम अपडेट: माघ २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्