काठमाण्डाै उपत्यकामा दैनिक २६ करोड लिटर पानी वितरण हुँदा पनि अभाव कायमै

मेलम्चीको पानीले पाइप फुट्दा ठाउँ–ठाउँका सडकमा भ्वाङ

फागुन १७, २०८० बिहीबार १८:१७:३४ | उज्यालो सहकर्मी

काठमाण्डौ – सरकारले काठमाण्डौ उपत्यकामा दैनिक २६ करोड लिटर पानी वितरण भइरहेको दाबी गरे पनि पानीको अभाव कायमै छ । मेलम्ची खानेपानी आयोजनाबाट दैनिक १७ करोड लिटर र काठमाण्डौको स्थानीय स्रोतबाट दैनिक नौ करोड लिटर गरेर २६ करोड लिटर पानी वितरण भइरहेको काठमाण्डौ उपत्यका खानेपानी लिमिडेट (केयूकेएल) का प्रवक्ता प्रकाशकुमार राईले उज्यालोलाई जानकारी दिनुभयो । तर पनि काठमाण्डौमा पानीको चरम अभाव छ ।

धेरै नागरिकलाई ट्याङ्कर र जारको पानी किनेर प्रयोग गर्नुपर्ने बाध्यता रहेको छ । सरकारले मेलम्ची खोलामा याङ्ग्री र लार्के खोलाको थप ३४ करोड लिटर मिसाएर दैनिक ५१ करोड लिटर पानी काठमाण्डौ ल्याउने र माग धान्ने योजना बनाएको छ तर अर्बाैँ रुपैयाँका यी आयोजनाको थालनी कहिले हुने हो भन्ने नै यकिन छैन ।

मेलम्चीकै पानी पनि हिउँदमा मात्रै काठमाण्डौमा आउँछ, बर्खामा बन्द हुन्छ । बर्खामा बाढी पहिरोका कारण पानी बन्द गर्दै आएको सरकारले यो वर्ष गएको माघको १ गतेदेखि हिउँदयामका लागि पानी पुनः वितरणको काम थालेको थियो ।

शुरुमा अनामनगर र मीनभवनमा वितरण गरिएको थियो । त्यसपछि क्रमशः महाङ्कालचौर, भक्तपुर, कीर्तिपुर, बोडे, नयाँ बानेश्वर, अनामनगर, बालाजु, खुमलटार, बोडे र पानीपोखरीबाट वितरण भइरहेको खानेपानी लिमिटेडले जनाएको छ । भौगोलिक अवस्था र पुरानो पाइपको सञ्जाल भएकाले सबैतिर समान तरिकाले वितरण गर्न समस्या भइरहेको प्रवक्ता राईले बताउनुभयो ।

कतिपय ठाउँमा नयाँ पाइपको परीक्षण चलिरेहकाले पुरानो पाइपबाटै पानी वितरण भइरहेको छ । ठाउँ–ठाउँमा नयाँ पाइप परीक्षणको काम भइरहेको छ । तर मेलम्चीको बाढीले मुहान क्षेत्र तहसनहस पारेकाले अबको केही महिनाभित्रै अर्थात् बर्खा लागेपछि मेलम्चीको पानी काठमाण्डौ आउन बन्द हुनेछ । पोहोर–परार जस्तै यस पटकको हिउँदमा पनि गेग्रान मात्रै हटाएर काठमाण्डौमा पानी पठाइएको र बर्खा लाग्नासाथ बन्द गर्ने मेलम्ची खानेपानी विकास समितिले जनाएको छ ।

पाइप फुट्दा ठाउँ-ठाउँमा सडक बिग्रिए

मेलम्चीको खानेपानी वितरण गर्ने सिलसिलामा पाइप फुट्दा काठमाण्डौका ठाउँ–ठाउँमा सडक बिग्रेका छन् । सबैभन्दा धेरै जमलबाट बूढानीलकण्ठ, लैनचौरबाट बालाजु र रातो पुल क्षेत्रमा सडक बिग्रेको छ । अन्य धेरै ठाउँमा सडकमा पाइप फुटेर पानी बग्ने, खाल्डा पर्ने लगायतका समस्या देखिएका छन् ।

पाइप मर्मतका लागि सडक खन्दा केयूकेएलले स्वीकृति लिए पनि आफूहरूले भनेअनुसार काम नगर्दा समस्या भएको सडक विभागका सुपरिटेन्डेन्ट इन्जिनियर अर्जुन अर्यालले जानकारी दिनुभयो । पानी वितरण गर्ने पाइप पुरानो भएको र त्यसबाट हुने चुहावटले सडकमा समस्या पारेको छ उहाँको भनाइ छ ।

सडक खनेको हप्ता/दश दिनमै सडक मर्मत गर्दै आएको इन्जिनियर अर्यालले दाबी गर्नुभयो । यसै बेला नेपाल विद्युत् प्राधिकरणको तार भूमिगत आयोजनाले पनि ठाउँ–ठाउँमा सडक खनेपछि काठमाण्डौ उपत्यकाका सडक फेरि अस्तव्यस्त हुन थालेका छन् । एउटा निकायले सडक खनेको केही दिनमै मर्मत गर्ने र फेरि अर्को निकायले सडक खन्दा नागरिकलाई सास्ती र बजेटको दुरुपयोग भइरहेको छ ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

काठमाण्डाै उपत्यकामा दैनिक २६ करोड लिटर पानी वितरण हुँदा पनि अभाव कायमै

मेलम्चीको पानीले पाइप फुट्दा ठाउँ–ठाउँका सडकमा भ्वाङ

फाइल तस्बिर

तपाईको प्रतिक्रिया