आसिफ अली हाल, यूएई ।

म अहिले यूएईमा एक सेक्युरिटी कम्पनीमा काम गर्छु । यो काम यूएईमा राम्रो पनि थियो । तर अहिले कोरोनाको सङ्क्रमण बढेसँगै जोखिम र तनाब बढ्यो यो काममा।

कम्पनीले पनि मनपरी गर्न थाल्यो । हाम्रो स्वास्थ्य सुरक्षाको त कुरै नगरौं । जोखिम धेरै भएको ठाउँमा काममा खटाउने गर्छ ।

जस्तै अस्पताल, कोरोना सङ्क्रमित राखेको आइसोलेशन लगायतका ठाउँमा ।

यस्तो ठाउँमा काम गर्दिनँ भन्दा सुखै पाईंदैन । यस्ता ठाउँमा काम गर्ने धेरैलाई कोरोना सङ्क्रमण भइसकेको छ, हाम्रै कम्पनीकालाई पनि । अब हाम्रो पालो आयो ।

हामीलाई कम्पनीले अब यस्तै जोखिमका ठाउँमा खटाउँदैछ । जान्नँ भन्न पनि पाइन्न । कि काम गर कि राजीनामा दिएर घर जा भन्छ । तर कसरी ? काममा गएन भने तलब काटिदिने लगायतका विभिन्न सजाय त छँदैछ ।

बस्ने ठाउँमा पनि यस्तै समस्या छ । प्रहरीले हाम्रो क्याम्पलाई कति समयसम्म त लक गरेर नै राख्यो ।

यहाँ क्याम्पमा धेरै जनालाई सङ्क्रमण देखिएपछि कति समय त साथीकोमा गएर समेत सुतें । तर कहिलेसम्म भाग्ने ? यहाँ बस्ने हो भने काम गर्नुपर्छ ।

तर काम गर्दा कोरोना सङ्क्रमणबाट बच्न गाह्रो छ । के गर्ने होला सोच्न सकेको छैन। कोरोनाको त्रासका बेला कम्पनीले मानसिक तनाब दियो हामीलाई ।

याे पनि पढ्नुहाेस्

अप्रिल ३० : खाडी र मलेसियामा काेराेना सङ्क्रमितकाे सङ्ख्या ६० हजार नाघ्याे

---