थरीथरीका आन्दोलनले काठमाण्डौको जनजीवन प्रभावित, मुख्य सडकमार्गमै हप्तौंदेखि अवरोध

सरकारलाई बाध्य बनाउन आन्दोलन आवश्यक छैन : प्रधानमन्त्री ओली

चैत २८, २०८१ बिहीबार १८:८:४५ | उज्यालो सहकर्मी

काठमाण्डाै – शिक्षकहरूको आन्दोलनका कारण आज दिउँसो माइतीघर–नयाँ बानेश्वर सडक ठप्प भयो । सडकका सबै लेन ढाक्ने गरी भएको प्रदर्शनका कारण आवागमन ठप्प भएको हो । यसको असरले आसपासको ट्राफिक व्यवस्थापन अस्तव्यस्त बन्न पुग्यो । मानिसहरूले घण्टौंसम्म सडकमा रोकिनुपरेकाे भन्दै आक्रोश व्यक्त गरिरहेका थिए ।

काठमाण्डौमा यो अवस्था आज मात्र हैन । काठमाण्डाैले झन्डै एक महिनादेखि यस्तै अवस्था भोगिरहनुपरेको छ । कहिले राजावादीहरूको प्रदर्शन, कहिले वित्तीय संस्था पीडितहरूको प्रदर्शन, कहिले शिक्षकहरूको प्रदर्शन त कहिले कुलमान घिसिङलाई हटाएको विरोधमा प्रदर्शन । कुनै दिन त १० वटाभन्दा धेरै प्रदर्शन भएका प्रहरीको तथ्याङ्क छ ।

अहिले शिक्षकहरू ९ दिनदेखि सडकमा प्रदर्शन गरिरहेका छन् । राजावादीहरूले पटक पटक प्रदर्शन गर्ने गरेकामा तीनकुने घटनामा पार्टीका नेताहरूलाई पक्राउ गरेको विरोधमा राष्ट्रिय प्रजातन्त्र पार्टी (राप्रपा) ले नियमित प्रदर्शन गरिरहेको छ । राजावादीहरूको छुटै आन्दोलन पनि छ । सङ्घीयता खारेजीको मागसहित राष्ट्रिय जनमोर्चाले पनि सडकमा प्रदर्शन गरिरहेको छ ।

राजावादीहरूको प्रतिकारमा कम्युनिस्टहरूले छुट्टै प्रदर्शन गरेका छन् । सत्तारूढ नेकपा एमालेले समेत राजावादीको प्रतिकारमा प्रदर्शन गरेको छ । सभापति रवि लामिछानेलाई पुर्पक्षका लागि थुनामा पठाएपछि राष्ट्रिय स्वतन्त्र पार्टी (रास्वपा) ले पनि सरकार विरोधी आन्दोलन सशक्त बनाउने चेतावनी दिएको छ ।

कवाड व्यवसायीदेखि चिकित्सक र संरक्षण अभियानकर्मीहरूसमेत गरी धेरै वटा समूह आन्दोलनमा भएकाले प्रशासनलाई प्रदर्शन क्षेत्र निर्धारण र सुरक्षा व्यवस्थामै सकस परिरहेको छ ।

सङ्घीय राजधानी काठमाण्डौ आन्दोलनमय भइरहेका बेला प्रधानमन्त्री केपी शर्मा ओली भने सरकारलाई बाध्य बनाउन आन्दोलन आवश्यक नरहेको बताउनुहुन्छ । नेपाल उद्योग वाणिज्य, महासङ्घको ५५औं वार्षिक साधारणसभा एवम् उद्योग वाणिज्य दिवस–२०८१ को उद्घाटन सत्रमा बोल्दै प्रधानमन्त्री ओलीले अहिलेको सरकार स्थायित्व र सुशासनको पक्षमा रहेकोले आन्दोलन आवश्यक नरहेको बताउनुभयो ।

तर प्रधानमन्त्री ओलीकै पार्टी एमालेदेखि, राजावादी र विभिन्न सङ्घ–संस्थाले आन्दोलन गर्दा काठमाण्डौ उपत्यकाको जनजीवन र व्यापार व्यवसायमा समस्या बढाउँदै लगेको पाइन्छ ।

अन्तिम अपडेट: बैशाख ५, २०८२

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

थरीथरीका आन्दोलनले काठमाण्डौको जनजीवन प्रभावित, मुख्य सडकमार्गमै हप्तौंदेखि अवरोध

सरकारलाई बाध्य बनाउन आन्दोलन आवश्यक छैन : प्रधानमन्त्री ओली

फाइल तस्वीर

तपाईको प्रतिक्रिया