रौतहट – अख्यिार दुरुपयोग अनुसन्धान आयोग हेटाैैंडाको टोलीले ४५ हजार रुपैयाँ घुससहित जिल्ला प्राविधिक कार्यालय रौतहटका इन्जिनियर अजयकुमार ठाकुरलाई शुक्रवार नियन्त्रणमा लिएको छ ।

फतुवा विजयपुर नगरपालिका वडा नम्बर-९ लक्ष्मीनिया टोलमा रहेको आधारभूत प्राथमिक विद्यालयको कम्पाउण्ड वाल र त्यसै ठाउँमा निर्माणाधीन कृषि सडकको अन्तिम भुक्तानीको लागि बिल बनाउन कार्यालयका सब इन्जिनियर यादवले पटक पटक फोन गरेर रकम मागेका थिए ।

मागेजति रकम नदिएमा बिल नबनाउने कुराको अडियो रेकर्ड पिडितहरुले अख्तियार दुरुपयोग अनुसन्धान आयोगको कार्यालय हेटौडामा उपलब्ध गराएका थिए ।
साथै, पीडितहरुले प्राविधिहरुलाई घुस दिने रकम समेत आयोगबाट उपलब्ध गराईदिन आग्रह गरेका थिए । 

पीडितहरुकाे आग्रहपछि आयोगको टोली गौर आएर रकम दिएर इन्जिनियर ठाकुरलाई दिन लगाएका थिए ।  इन्जिनियर ठाकुरले रकम लिएर गोजीमा राख्नेबित्तिकै उक्त टोलीले पक्राउ गरेका हुन् ।

पिडितहरुले अख्तियार दुरुपयोग अनुसन्धान आयोग हेटौंडामा दिएको किटानी जाहेरीका आधारमा अख्तियारका शाखा अधिकृत तिर्थराज उपाध्यायको नेतृत्वको टोलीले ठाकुरलाई प्राविधिक कार्यालय गौरकै कार्यकक्षमा रंगेहात पक्राउ गरेका हुन् ।

। दशी प्रमाण सहित पक्राउ परेका इन्जिनियर ठाकुरलाई आवश्यक प्रक्रिया पूरा गरेर कारवाहीको लागि हेटौंडा तर्फ लैजाने तयारी भईरहेको उपाध्यायले बताउनुभयो ।

रकम माग गर्ने सब इन्जिनियर यादवलाई भने रकम दिँदा लिन नमानेको र त्यहाँबाट उम्किन सफल भएको जनाइएको छ ।