सुदूरपश्चिममा फेरि हिमपात : जनजीवन प्रभावित

पुष १८, २०७६ शुक्रबार १०:४३:४० | उज्यालो सहकर्मी

उज्यालाे सहकर्मी : विमल विष्ट र नेत्र शाही

जुम्ला – जुम्लामा यस वर्ष दोस्रो पटक हिमपात भएको छ । शुक्रबार बिहानैदेखि हिमपात भएपछि अत्यधिक चिसो बढेको छ ।

चिसोले कारण यहाँको जनजीवन कष्टकर बनेको छ भने स्थानीयबासी घरबाहिरको काममा पनि निस्कन सकेका छैनन् । तीन दिनदेखि बादल लागेको र शुक्रबार हिमपात सुरु हुन थालेपछि जुम्लामा यातायात तथा शैक्षिक संस्था प्रभावित भएका छन् ।

तस्बिर : विमल विष्ट

चिसोले बालबालिका र ज्येष्ठ नागरिक सबैभन्दा बढी प्रभावित भएका छन् । अहिले जुम्लाको तापक्रम माइनस २ दशमलव ६ डिग्री सेल्सियसमा झरेको हावापानी फिल्ड कार्यालय जुम्लाले जनाएको छ । हिमपातका कारण चिसाे बढेपछि जुम्ला प्रशासन कार्यालयले सुरक्षित रहन आग्रह गरेकाे छ ।

त्यस्तै डोटीमा पनि बिहीबार रातिदेखि हिमपात भइरहेको छ । हिमपातपछि चिसो बढ्दा यस क्षेत्रको जनजीवन प्रभावित भएकोे छ । डोटीका हिमाली भेगमा बिहीबारदेखि भारी हिमपात भइरहेको हो । हिमपातका कारण निकै कष्ट भएको स्थानीय सिद्धराज जोशीले जानकारी दिनुभयो ।

भारी हिमपातका कारण डोटीका लेकाली बस्तीहरु अहिले हिउँले सेताम्य भएका छन् । हिमपातपछि जिल्ला सदरमुकाम सिलगढीसँगै जोडिएका स्वाँडा, मछिन्तोला, गोलादेउ, झिग्राराना लगायतका गाउँहरु पनि सेताम्मे भएका छन् ।

हिमपातका कारण स्थानीयहरु घरबाहिर निस्किन नसकिरहेको भिग्रानाका स्थानीय भरतबहादुर साउदले बताउनु भयो । उहाँले भन्नुभयो, ‘राति परेको हिउँले डाँडाकाँडा पूरै ढाकेको छ, गाईवस्तुसँगै मान्छे पनि बाहिर निस्किन सक्ने अवस्था छैन ।’

हिमपातसँगै चिसो बढेपछि वृद्धवृद्धा तथा बालबालिकामा ज्वरो, निमोनिया, रुघाखोकी जस्ता समस्या निम्तिएको जिल्ला अस्पताल डोटीका निमित्त मेडिकल सुपरिटेण्डेन्ड डा. ज्योति पाण्डेले जानकारी दिनुभयो । उहाँका अनुसार अहिले अस्पतालमा झण्डै ३० जना बिरामी भर्ना भएका छन् ।

त्यस्तै २५ वर्षपछि डाेटीकाे सदरमुकाम सिलगढीमा हिमपात भएकाे छ ।

अन्तिम अपडेट: कात्तिक १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्