पाँचथर – कोरोना भाइरसको सङ्क्रमणमुक्त घोषणा गरिएको पाँचथरमा फेरि नयाँ सङ्क्रमित भेटिएका छन् ।

पछिल्लो पटक गरिएको पीसीआर परीक्षणमा एक जना नयाँ सङ्क्रमित भेटिएका हुन् । गएकाे साउन २ गते सबै सङ्क्रमित निको भएको भन्दै जिल्ला प्रशासन कार्यालयले पाँचथरलाई काेराेना सङ्क्रमणमुक्त जिल्ला घोषणा गरेको थियो । 

वैदेशिक रोजगारीका क्रममा साउदी अरब गएर फर्किएका याङवरक गाउँपालिका ४ थर्पुका २९ वर्षीय पुरुषमा कोरोना सङ्क्रमण पुष्टि भएको प्रदेश नम्बर १ काे सामाजिक विकास मन्त्रालयले जनाएको छ । 

उनी एक हप्ताअघि साउदीबाट भक्तपुरको होल्डिङ सेन्टर हुँदै पाँचथर आइपुगेका थिए । जिल्ला आएपछि पाँचथर बहुमुखी क्याम्पसको क्वरेण्टीनमा राखिएका उनमा काेराेनाकाे सङ्क्रमण देखिएपछि उपचारकाे लागि मोरङ पठाइएको स्वास्थ कार्यालय पाँचथरका प्रमुख नारदमुनि सुवेदीले जानकारी दिनुभयो ।

पाँचथरमा यसअघि चार जनामा सङ्क्रमण देखिएको थियो । उनीहरु सबै उपचारपछि निको भएर घर फर्किसकेका छन् ।