रिपोर्ट कुर्दै, मिनी पार्क बनाउँदै

भदौ १६, २०७७ मंगलबार १९:१३:५८ | हेमराज शर्मा

दाङ – तुलसीपुर उपमहानगरपालिका ११ मा रहेको उरहरि स्वास्थ्य चौकी बेल्टाकुराका स्वास्थ्यकर्मीहरु मङ्गलबार बिहानै स्वास्थ्य चौकी परिसरमा पसिना पुछ्दै हस्याङफस्याङ गर्दै थिए । कोही कुटो र कोदालोले खन्ने र खोस्रने गर्दै थिए भने कोही इँटा अनि माटो बोक्दै थिए ।

सधैँ बिरामीको सेवामा व्यस्त हुने स्वास्थ्यकर्मीहरु मजदुर जस्तै कडा परिश्रम गर्दै गरेको यो दृश्य रोचक अनि फरक देखिन्थ्यो । एक जना स्वास्थ्यकर्मीमा कोरोना पोजेटिभ देखिएपछि गएको भदौ ८ गतेदेखि सिल गरिएको यस स्वास्थ्य चौकीका कर्मचारीहरु अफिस क्वरेण्टीनमा बस्दै आएका छन् ।

उनीहरु त्यहाँ बसेदेखि नै स्वास्थ्य चौकी परिसरमा मिनी पार्क निर्माण गर्न जुटेका हुन् । उनीहरु आफै खाना पकाएर खान्छन् अनि बाँकी समय स्वास्थ्य चौकी परिसरको सजावटमा व्यस्त हुन्छन् ।

स्वास्थ्य चौकीमा कार्यरत नाै जना स्वास्थ्यकर्मी ८ गतेदेखि अफिस क्वरेण्टीनमा छन् भने १० गते कोरोना परीक्षणका लागि स्वाब दिएर रिपोर्ट पर्खिरहेका छन् । विभिन्न समयमा रचनात्मक गतिविधिमा सक्रिय भएर चर्चा बटुल्दै आएका यस स्वास्थ्य चौकीका स्वास्थ्यकर्मीहरु अहिले आफ्नो स्वास्थ्यसँगै आफू कार्यरत स्वास्थ्य चौकी परिसरलाई सजाउन व्यस्त छन् ।

अफिस क्वरेण्टीनमा बसेदेखि नै स्वास्थ्य चौकी परिसरमा मिनी पार्क निर्माण गरी विभिन्न फूल रोप्न व्यस्त स्वास्थ्यकर्मीहरु आफू कार्यरत संस्थालाई सबै प्रकारले उत्कृष्ट बनाउनु आफ्नो कर्तव्य सम्झिन्छन् ।

स्वास्थ्य चौकीका इन्चार्ज चित्र वलीको नेतृत्वमा एचए, सीएमए, ल्याब असिस्टेन्ट अनि अन्य स्वास्थ्यकर्मीहरु क्वरेण्टीनमा बसेदेखि नै स्वास्थ्य चौकी परिसरलाई सुन्दर अनि आकर्षक बनाउन मेहनत गरिरहेका छन् ।

बिरामीहरुलाई स्वास्थ्य सेवाका साथै मानसिक रुपमा पनि मनोरञ्जनको वातावरण निर्माणका लागि यो अभियान सुरु गरिएको इन्चार्ज चित्र वलीले बताउनुभयो । काममा व्यस्त हुँदा मानसिक रुपमा पनि कोरोनाको डर हराउने भएकाले रिपोर्ट नआउँदासम्म विभिन्न रचनात्मक क्रियाकलापमा लाग्ने सोच बनाएको उहाँले बताउनुभयो ।

स्वास्थ्य चौकीका एचए यज्ञबहादुर केसीले पनि आत्मसन्तुष्टि र स्वास्थ्य चौकीलाई आकर्षक बनाउन, बिरामीहरुलाई मिनी पार्कको अनुभूति दिलाएर ऊर्जा थप्न मिनी पार्क निर्माणमा जुटेको बताउनुभयो ।

अन्तिम अपडेट: कात्तिक १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हेमराज शर्मा

दाङमा बसेर पत्रकारिता गर्ने हेमराज शर्मा लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्