काभ्रे – काभ्रेको पाँचखाल नगरपालिका–१२, कासकोटको तीनघरे छेउमा सहकारीको तीजको दर खाँदा बिरामी हुनेको संख्या ३७९ पुगेको छ । 

बिरामीमध्ये १३५ जना अझै अस्पतालमा उपचाररत छन् भने बाँकीको डिस्चार्ज भएको जिल्ला प्रहरी प्रमुख रविराज खड्काले जानकारी दिनुभयो ।

अहिलेपनि धुलिखेल अस्पतालमा २१ जना, शिर मेमोरियल अस्पतालमा ५१ जना, प्राथमिक स्वास्थ्य केन्द्र पाँचखालमा ४४ जना, पाँचखाल सुदिप मेडिकलमा १६ जना र बनेपा हस्पिटलमा ३ जनाको उपचार भइरहेको प्रहरी प्रमुख खड्काले जानकारी दिनुभयो । 

प्रदेश सांसद भुर्तेल पनि बिरामी 

सहकारीकाे दर खाएर बिरामी हुनेमा प्रदेश नं ३ का सांसद गोमा भुर्तेल पनि हुनुहुन्छ । उहाँ कार्यक्रमको प्रमुख अतिथिको रुपमा सहभागी हुनुभएको थियो । उहाँको पनि उपचार भैरहेको प्रहरीले जनाएको छ । 

ग्रामीण स्वाबलम्बन बहुउद्देश्यीय सहकारी संस्थाले शुक्रबार दिउँसो आयोजना गरेको तीज विशेष कार्यक्रममा दर खाएकाहरु बिरामी परेका हुन् ।