संखुवासभा – संखुवासभामा प्रदेश सभाको मतपत्रमा प्रतिनिधि सभाको मतदान भएपछि स्थगित भएको मतदान पुनः सञ्चालन भएको छ ।

बिहान सहज ढंगले मतदान सुरु भएकोमा मतदानमा खटिएका कर्मचारीले झुक्किएर प्रतिनिधि सभाको मतपत्र दिनुपर्नेमा प्रदेश सभाको मतपत्र दिएपछि २१ वटा त्यस्ता मतपत्रमा मतदान भएको थियो । 

पछिल्लो पटक मतदान गर्ने व्यक्तिले मतदान गर्ने क्रममा प्रतिनिधि सभाको मतपत्र दिनुपर्नेमा प्रदेश सभाको मतपत्र परेको जानकारी गराएपछि मतदान स्थगित भएको थियो । 

पछि प्रमुख जिल्ला अधिकारी लगायत मतदान अधिकृत र राजनीतिक दलका कर्मचारीसहितको सर्वदलीय बैठक बसी मतदान पुनः सञ्चालन गर्ने निर्णय गरेको थियो । 

बैठकपछि गल्तीले मतदान भइसकेका त्यस्ता २१ वटा मतपत्र अहिले सील गरेर राख्ने र मतदान जारी राख्ने निर्णय भएको थियो । मतगणना हुँदा ती मतपत्र गणना गर्ने नगर्ने सन्दर्भभा भने कुनै निर्णय भएको छैन ।