सङ्खुवासभा – सङ्खुवासभाको दुर्गम र विकट क्षेत्र भोट खोला गाउँपालिकाका तीन वटा मतदान केन्द्रका मतपेटिका हेलिकप्टरबाट सदरमुकाम खाँदबारी ल्याइएको छ ।

छिमेकी देश चीनको सीमावर्ती किमाथांका, थुदाम र रिदाक मतदान केन्द्रका मतपेटिका नेपाली सेनाको हेलिकप्टरबाट ल्याइएको हो । सदरमुकाम खाँदबारीबाट १६२ किलोमिटर टाढा रहेको किमाथांकाबाट ल्याइएको हो । 

भोट खोला गाउँपालिका–१ किमाथांकामा १ सय ४८ मत खसेको छ भने भोट खोला–२ थुदाम मतदान केन्दमा २० मत खसेको छ ।

यी सबै केन्द्रको मत पेटिका खाँदबारी ल्याइएको हो । अहिले सम्म १ सय ६४ मतदान केन्द्र मध्ये १ सय ५ केन्द्रको मतपेटिका सदरमुकाम खाँदबारीमा ल्याइसकेको मुख्य निर्वाचन अधिकृतको कार्यालयले जनाएको छ ।

अन्य मतदान केन्द्रको मतपेटिकाहरू भने पैदल नै सदरमुकाम खाँदबारी ल्याउने काम भइरहेको छ । आज बेलुकीसम्म मतपेटिका सङ्कलनको काम भएपछि सर्वदलीय बैठक बसेर मतगणना सुरु हुने जनाइएको छ । मतगणनाको लागि जिल्ला समन्वय समितिका हलमा तार जाली र सिसी क्यामेरा जडान गरी तयार गरिएको छ । 

सङ्खुवासभामा ५६ प्रतिशत अर्थात् ६५ हजार ८ सय ९२ मत खसेको थियो । सङ्खुवासभामा १ लाख १७ हजार ५ सय ५४ मतदाता रहेका छन् ।