काठमाण्डाै – नेकपा एमालेका सांसद रघुजी पन्तले नेपाली सेनाले आफ्ना लागि चाहिने न्यूनतम गोलीगट्ठा र बारुद उत्पादन गर्न नसक्नुको कारण माग गर्नुभएको छ ।

आज बुधवार सिंहदरबारमा बसेको राज्य व्यवस्था र सुशासन समितिको बैठकमा सांसद पन्तले नेपाली सेनाले विस्फाेटक पदार्थका लागि पनि छिमेकी देशको भर पर्नुपर्ने अवस्था हो भन्दै प्रश्न गर्नुभएको हो । उहाँले ढुङ्गा फोड्न, पड्काउन अरूको मुख ताक्नुपर्ने अवस्थाको अन्त्य हुनुपर्ने बताउनुभयो । उहाँले बाटो बनाउन पनि छिमेकीबाट बारुद आएन भनेर बस्नुपर्ने अवस्था ताेड्नका लागि हाम्रो सैनिक नेतृत्वले कति प्रयत्न गरेको छ भन्दै प्रश्न गर्नुभयो ।

उहाँले भन्नुभयो, ‘मित्र राष्ट्र भारतबाट विस्फाेटक पदार्थको आपूर्ति हुन नसकेको, मित्र राष्ट्र चीनबाट विस्फाेटक पदार्थको आपूर्ति अहिले भइरहेकाे कुराले एउटा सेन्सेटिभ बनाएको छ । हाम्रो त यही सेना हो, यो सेनाले आफ्ना लागि चाहिने न्यूनतम गोलीगट्ठा र बारुद पनि अहिलेसम्म उत्पादन गर्न सक्दैन ? अहिलेसम्म ढुङ्गा फोड्न, पड्काउन अरूको मुख ताक्नुपर्ने हो ? देश आत्मनिर्भर हुनुपर्दैन आफ्नो रक्षामा ? जाबो बाटो बनाउन पनि छिमेकीबाट बारुद आएन भनेर बस्नुपर्ने अवस्था ताेड्नका लागि हाम्रो सैनिक नेतृत्वले कति प्रयत्न गरेको छ ?’

सांसद पन्तले कुनै बेला युद्धका लागि तयार हुनपर्ने भए कति दिनसम्म नेपाली सेनाले थेग्छ भन्दै प्रश्न पनि गर्नुभयो ।