जुम्ला - कर्णाली राजमार्गको पादुका खोलादेखि सुर्खेततर्फको क्षेत्रमा अत्यधिक धुलो र हिलोले सास्ती भएको छ । पक्की बाटो बिग्रेर झण्डै तीनवर्षदेखि कच्ची सडक बनेको छ । तर बेलैमा मर्मत हुन नसक्दा यात्रुले सास्ती खेप्नुपरेको छ ।

कर्णाली राजमार्गको एक सय ३२ किलोमिटरमध्ये दैलेखखण्डको पादुका खोलादेखि पाल्तडासम्मको १२ किलोमिटर सडक क्षेत्रमा पर्ने कच्चीबाटोमा घाम लाग्दा धुलो र पानी पर्दा हिलोको समस्या बल्झिरहने गरेको छ । 

पादुका खोला दैलेख जिल्लाको भैरवी छहराबाट उद्गम भएर पादुकास्थान हुँदै कर्णाली नदीमा मिल्ने खोला हो । कर्णालीको जीवनमार्गको रुपमा रहेको कर्णाली राजमार्गमा दैनिक गुडिरहने गाडी अनि नेपालको सबैभन्दा ठूलो रारातालमा घुम्न पुग्ने पर्यटकलाई लागि बाटोले सास्ती दिने गरेकाे छ। चालक आदित्य शाहीले बाटोको खराब अवस्थाले हैरान भएको बताउनुभयो । उहाँले जोखिम हुँदा पनि सम्बन्धित निकायबाट कुनै पहल नभएको गुनासो गर्नुभयो ।

कर्णाली राजमार्गको सुर्खेतबाट दैलेख दहीखोलासम्मको एक सय ३२ किलोमिटरको सडक–सडक डिभिजन कार्यालय सुर्खेत र दही खोलादेखि जुम्लासम्मको खण्ड सडक डिभिजन कार्यालय जुम्लाको जिम्मामा छ । यस अन्तर्गत अहिले दैलेख खण्डमा सबैभन्दा धेरै धुलाम्मे सडक छ । मर्मतका लागि कामको जिम्मा लिएको निर्माण व्यवसायीले निर्माण समयमै नगरेपछि समस्या भएको हो ।

सडक डिभिजन कार्यालयका फिल्ड इञ्जिनियर अशोक चौधरीले थेगिम–मजदुर–नाम्जिला आकांक्षा जेभी निर्माण व्यवसायीले तीन ठाउँमा ३१ किलोमिटर सडक मर्मत गर्ने भनेर २०७८ असोज २२ गते ११ महिनाका लागि सम्झौता गरेको तर काम अहिलेसम्म हुन नसकेको बताउनुभयो । इञ्जिनियर चौधरीले निर्माण व्यवसायीले सम्झौताअनुसारको काम नगरेपछि ठेक्का तोड्ने तयारी भइरहेको समेत जानकारी दिनुभयो । ११ करोड रुपैयाँमा निर्माण व्यवसायीसँग सम्झौता भएकोमा दुई करोड रुपैयाँ, भुक्तानी लिइसकेको छ । 

सडककै अर्को खबर, लमजुङको बेँसीसहर–चामे सडकको झण्डै ८ किलोमिटर कालोपत्र भएको छ । लमजुङ–मनाङ जोड्ने एक मात्र सडकअन्तर्गत बेंसीसहरदेखि खुदीसम्मको ७ दशमलव ८ किलोमिटर सडक कालोपत्र भएको हो । डुम्रे–बेँसीसहर–चामे सडक योजना कार्यालयका सूचना अधिकारी एवं इञ्जिनियर किरण पोखरेलले यो सडकमा ८५ प्रतिशत काम सम्पन्न भएको बताउनुभयो । योजना कार्यालयका अनुसार सडक स्तरोन्नति तथा कालोपत्र गर्न अहिलेसम्म १९ करोड रुपैयाँ खर्च भएको छ । ट्राक खोलेको २९ वर्षपछि अमेरिकन प्रविधिको अस्फाल्ट कालोपत्र राख्ने काम भइरहेको इञ्जिनियर पोखरेलले बताउनुभयो ।

मनाङ जिल्लालाई सडक सञ्जालमा जोड्ने सरकारको योजनाअनुसार २०५१ सालदेखि सडक डिभिजन कार्यालय तनहुँले निर्माण शुरु गरेको थियो । पछि २०५७ देखि तत्कालीन नेपाली सेनाले सडक निर्माणको जिम्मा पाएको थियो ।