रवीन्द्र अधिकारीलाई रवीन्द्र मिश्रकाे पत्र : देश नबनाइकनै जानुभयो !

फागुन १७, २०७५ शुक्रबार १६:२६:७ | उज्यालो सहकर्मी

काठमाण्डाै - आफ्नाे फेसबुक पेजमार्फत हेलिकप्टर दुर्घटनामा परि निधन भएका रवीन्द्र अधिकारीसँगै खिचिएकाे आफ्नाे पुरानाे फाेटाे पाेस्ट गर्दै विवेकशील साझा पार्टीका स‌ंयाेजक रवीन्द्र मिश्रले भावुक चिठी लेख्नुभएकाे छ । चिठी यस्ताे छ.....

रवीन्द्रजी,

केही दिनदेखि बिसञ्चो भएकोले श्रद्धाञ्जलीका लागि आउन पाइनँ । यो फोटो सन् २०१२ मा मेरो घरमा खिचिएको रहेछ । पूर्व माओवादीका प्रखर वक्ता तथा युवा नेता हेमराज भण्डारी (तस्बिरमा देब्रे) जसले लगभग ३० वर्षकै उमेरमा धनकुटामा पुराना पार्टीका पुराना नेतालाई चुनावमा हराएका थिए।

त्यति बेला तपाईँ, गगनजी, हेमराजजी र म सामूहिक रूपमा कहिलेकाहीँ भेट्थ्यौँ। यो देश हाम्रै पुस्तामा कसरी रूपान्तरण गर्न सकिएला भन्ने हाम्रो छलफलको मूल विषय हुन्थ्यो ।

हामी सबै एकै पुस्तामा यो देश बदल्न सकिन्छ भन्नेमा सहमत थियौँ। तर हामी एक ठाउँमा आउन सकेनौँ । आ-आफ्नै बाटोमा हिँड्यौँ। तपाईँको र मेरो त पछि पनि धेरै पटक भेटघाट भयो, देशकै बारेमा विमर्श गर्न। प्रारब्धले तपाईँलाई चाँडै लिएर गयो।

तपाईँले छोडी जानुभएको पार्टी या अन्य कुनै पार्टीले एकै पुस्तामा यो देश रूपान्तरण गर्‍यो भने त्यो तपाईँका लागि सबैभन्दा ठूलो श्रद्धाञ्जली हुनेछ।

मृत्यु कहिले, कुन बेला, कसरी, कसलाई, कहाँ लिन आउँछ – कसलाई के थाहा। गएपछि सबै खरानी। अमरत्वको पनि जानेलाई कुनै अर्थ हुँदैन। बाँच्नेहरूले त्यसमा अर्थ खोज्ने मात्रै हो।

हामीले बाँचुञ्जेल इमानदारीपूर्वक मानव हुनाको कर्तव्य निर्वाह गर्यौं भने त्यसबाट बितेर गएका तपाईंलगायत सातै जानाको आत्माले चीर शान्ति पाउने छ।

मृत्युपश्चातको जीवन रहेछ भने कुनै दिन भेट हुनसक्छ। देश बनेको समाचार लिएर आउन पायौँ भने फेरी एकपल्ट तपाईँको सरल हाँसोसँगै खुशी बाँडौँला।

तपाईँको हितैषी
रवीन्द्र मिश्र

अन्तिम अपडेट: माघ ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्