कार्यकर्ता प्रशिक्षणमा नेकपा प्रवक्ता श्रेष्ठले भने : गुटको कुरा गर्नेलाई लोप्र्याइदिनूस्

फागुन २०, २०७५ सोमबार १८:३७:३० | किरण लोहनी

गोरखा – नेपाल कम्युनिष्ट पार्टी नेकपाका प्रवक्ता नारायणकाजी श्रेष्ठले १५ दिनभित्र पार्टीको सांगठनिक एकताको टुंगो लाग्ने दाबी गर्नुभएको हो ।

पार्टीका दुई अध्यक्षले यसको गृहकार्य थालिसकेको भन्दै उहाँले कम्तीमा १५ दिनभित्र यसबारे स्पष्ट खाका आउने बताउनु भएको हो ।

नेकपा सिरानचोक गाउँपालिकाले छोप्राकमा गरेको अगुवा कार्यकर्ता प्रशिक्षण कार्यक्रममा बोल्दै उहाँले भन्नुभयो, ‘पार्टीको एकता ३ महिनाभित्र टुंगिन्छ भनेका थियौँ, तर ९ महिना भैसक्दा पनि कामै भएको छैन, यसमा हामी सबैको दोष छ, मेरो भागमा दोषको हिस्सा कति पर्छ म जिम्मा लिन्छु ।’ तर अब भने पार्टी सचिवालय र अध्यक्षद्वयले सांगठनिक एकताको टुंगो लगाउनका लागि पर्याप्त गृहकार्य गरिसकेको उहाँको भनाइ छ ।

सांगठिनक एकता नटुंगिएकै कारण तल्लो तहसम्म पार्टी पुग्न नसकेको भन्दै उनले सरकार र पार्टीको आलोचना गर्न चाहनेहरुलाई फाइदा पुगेको बताउनुभयो ।

‘हाम्रा साथीहरु अल्मलिनु भएको छ, वा कतिपयलाई त पार्टी एकता नै पो नहुने हो कि भन्ने लाग्न थालेको पनि हुन सक्छ’, उहाँले भन्नुभयो, ‘यो ऐतिहासिक अवसरलाई हामी गुम्न दिँदैनौं, एकता नहोस् भन्ने चाहनेहरुलाई हामी छिट्टै गतिलो जवाफ दिन्छौँ ।’ पार्टी एकता नटुंगिदै गुट उपगुटको चर्चा चल्न थालेकोमा नेता श्रेष्ठले आक्रोश व्यक्त गर्नुभयो । उहाँले कार्यकर्तालाई भन्नुभयो, ‘गुटको कुरा नसुन्नुहोस्, पार्टीको निर्णय मान्नुहोस् र पार्टीलाई आफ्नो सुझाव दिनुहोस् । गुटको कुरा गर्नेलाई लोप्र्याइदिनूस् ।’

कार्यकर्ता प्रशिक्षण कार्यक्रममा बोल्दै प्रवक्ता श्रेष्ठले सरकारका राम्रा कामको बचाउ गर्दै नराम्रो काम सच्याउनका लागि सुझाव दिन कार्यकर्ताहरुलाई आग्रह गर्नुभयो । ‘सरकार सञ्चालनको बल्ल एक वर्ष भएको छ, अहिले नै यो पनि भएन, त्यो पनि भएन भन्ने बेला होइन’, उहाँले भन्नुभयो, ‘एक वर्षको बीचमा सरकारले काम गर्ने आधार तयार पारिसकेको छ, अब जनताले देख्ने गरी काम हुन्छ ।’

पार्टीको घोषणापत्रमा उल्लेख भएअनुसार वृद्ध भत्ता बढाइने उहाँले दाबी गर्नुभयो । ‘पाँच वर्षभित्र वृद्धभत्ता पनि बढेर ५ हजार रुपैयाँ पुग्छ, ढुक्क हुनुहोस् ।’ गोरखालाई लक्षित गरेर सरकारले केही ठूला विकासका कार्यक्रम कार्यान्वयन गर्न लागेको उहाँले बताउनुभयो । खुल्ला विश्वविद्यालयको केन्द्रीय कार्यालय गोरखामै राख्नेबारे गृहकार्य थालिएको भन्दै प्रवक्ता श्रेष्ठले जिल्लामा जडिबुटी प्रशोधन उद्योग सञ्चालनबारे पनि अध्ययन भैरहेको जानकारी दिनुभयो ।

बुढीगण्डकी जलविद्युत आयोजना कुनै पनि हालतमा निर्माण सम्पन्न गर्न सरकार दृढ रहेको उहाँको भनाइ छ । त्यसै क्रममा नेकपा प्रवक्ता श्रेष्ठले विभिन्न आन्दोलनमा सहादत प्राप्त गरेका सिरानचोकका ३० शहिदका परिवारलाई सम्मान गर्नु भएको थियो ।

नेकपाको गाउँपालिका संयन्त्र सदस्य नवराज पुडासैनीको अध्यक्षतामा भएको कार्यक्रममा गण्डकी प्रदेशका भौतिक पूर्वाधार विकासमन्त्री एवम् नेकपाका केन्द्रीय सदस्य रामशरण वस्नेत, प्रदेश कमिटी सदस्य कमला नहर्की र प्रेम गुरुङले पनि मन्तव्य व्यक्त गरेका थिए ।

अन्तिम अपडेट: मंसिर १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्