सेती अञ्चल अस्पतालमा २ जना मात्रै विशेषज्ञ डाक्टर रहने

चैत २२, २०७५ शुक्रबार २०:२८:२७ | निर्मला खडायत

धनगढी - सुदूरपश्चिम प्रदेशको एकमात्र अस्पताल सेती अञ्चल अस्पताल विशेषज्ञ चिकित्सकविहीन बन्ने अवस्थामा पुगेको छ ।

अस्पतालमा रहेका अधिकांश सरकारी चिकित्सक समायोजन भएर संघमा गएपछि अस्पताल चिकित्सक विहिन बन्ने अवस्थामा पुगेको हो । अस्पतालमा १५ जना चिकित्सक रहेकोमा १३ जना समायोजनपछि संघमा फर्किने तयारीमा छन् ।

समायोजन हुँदा दुई जनाले मात्र प्रदेश रोजेको र उनीहरु मात्रै अस्पतालमा रहेका छन् । समायोजनमा संघ रोजेका डा.कपिल गौतम संघीय सरकारले गरेको समायोजन कार्यान्वयन भए सुदूरपश्चीम प्रदेश चिकित्सकविहीन बन्ने बताउनुहुन्छ ।

सुदूरपश्चिम प्रदेशको एकमात्र रेफरल अस्पतालका रुपमा रहेको सेती अञ्चल अस्पतालमा कार्यरत १५ सरकारी चिकित्सकमध्ये डा. खगेन्द्र भट्ट र जगदीश जोशी दुई जनाले मात्रै प्रदेश रोजेका छन् ।

सरकारी चिकित्सक संघ र नेपाल चिकित्सक संघले भने देशको विभिन्न स्वास्थ्य संस्थामा कार्यरत चिकित्सकहरुलाई संघले नै चलाउन पर्ने मागसहित आन्दोलन गरिरहेका छन् ।

समायोजनका नाममा चिकित्सकलाई संघ र प्रदेश भनेर छुट्याउन नहुने नेपाल चिकित्सक संघ सुदूरपश्चिम प्रदेश संयोजक डा.प्रमोद जोशी बताउनुहुन्छ ।

अस्पतालमा रहेका अधिकांश सरकारी चिकित्सकले सङ्घ रोजे पनि त्यसको औपचारिक जानकारी भने अहिलेसम्म आफूहरुलाई नआएको सेती अञ्चल अस्पतालका मेडिकल सुपरिटेन्डेन्ट डा. हेमराज पाण्डेयले बताउनुभयो ।

चिकित्सकको संघमा समायोजन गरिए पनि सेती अस्पतालका लागि आवश्यक व्यवस्था मिलाउनु पर्ने डा.पाण्डेय बताउनुहुन्छ । प्रदेश मातहत रहेका सरकारी अस्पतालका डाक्टरहरुलाई संघीय सरकारले समायोजन गरेर आफूमातहत राखेको छ ।

समायोजनमा चिकित्सकहरुले संघ रोजेपछि सुदूरपश्चिम प्रदेशका ८८ वटै स्थानीय तह डाक्टर विहिन नै हुने भएका छन् ।

तर सुदूरपश्चिम प्रदेशका सामाजिक बिकास मन्त्रालयका सचिव गोगनबहादुर हमालले भने समायोजनका कारण प्रदेशको स्वास्थ्य सेवामा समस्या नआउने दाबी गर्नुहुन्छ ।

वि.सं. १९९७ सालबाट १५ शैयासहित जिल्ला अस्पतालको रुपमा सेवा शुरु भएको हाल ५० शैयाका लागि स्वीकृति पाएको छ । तर, अस्पतालले आन्तरिक स्रोतबाट थप गरेर २ सय ४० शैया सञ्चालन गरिरहेको छ ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

निर्मला खडायत

खडायत कैलालीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्