हुम्लामा नुन पाउँदाको खुशी

वैशाख ११, २०७६ बुधबार १८:१४:५६ | रमेश ऐडी

हुम्ला – अदानचुली गाउँपालिकाका ६० वर्षीय रगवीर शाहीले गएको वर्ष पाँच प्याकेट नुन पाउनुभएको थियो । यसपाली उहाँले गाउँपालिकाको केन्द्रबाट २४ किलो नुन पाउनुभयो । एकैपटक २४ किलो नुन पाउँदा उहाँमा खुशीको सीमा थिएन ।

‘यस वर्ष दुई घण्टामै नुन पाइयो, निकै सजिलो भयो’, दंग पर्दै उहाँले भन्नुभयो । पहिले नुन लिनका लागि कि त दुई दिन लगाएर सदरमुकाम पुग्नुपर्दथ्यो या त बाजुराको सिमाना कवाडी बजारसम्म धाउनुपर्दथ्यो । तर यस वर्ष गाउँपालिकाका पदाधिकारी, साल्ट ट्रेडिङका कर्मचारी र ठेकेदारले गाउँपालिकाको केन्द्रमै पुर्याएर नुन वितरण गर्दा शाही जस्तै धेरै गाउँले खुशीले गद्गद् भए ।

नुनका लागि पिठ्युँमा भारी बोकेर पैदल हिँड्नुपर्ने दुःख केही कम भएको नुन लिन आएका अर्का स्थानीयवासी अदानचुली–६, का गोकुल बुढाले बताउनुभयो । नुन लिन बुधबार दिनभर बालबालिका, वृद्धवृद्धा, महिला, अशक्त लगायतको भिड थियो ।

देशमा लोकतन्त्र स्थापना भएको १३ वर्ष पूरा भए पनि हुम्लीको लागि नुनकै जोहो गर्न मुश्किल छ । यातायातको सहज पहुँच नहुँदा पोहोरसम्म नुनकै लागि दिनरात पैदल हिँड्नुपर्ने बाध्यता थियो । यस वर्षदेखि हरेक गाउँपालिकाको केन्द्रबाट नुन वितरण गर्न पहल भएपछि हुम्लाका अदानचुली ताजाकोट सर्केगाढ र चंखेल्नी गाउँपालिकाका बासिन्दाले राहत पाएका छन् ।

बर्सेनि ठेकेदारले स्थलमार्गबाट ल्याउने व्यवस्था भए पनि सम्बन्धित ठाउँमा नपुर्याई बीच बाटोबाट वितरण गर्दा स्थानीयबासिन्दालाई सकस हुने गरेका थियो । यस वर्ष गाउँपालिकाकै केन्द्रबाट नुन वितरण गरिएको छ ।

वर्षभरिलाई खाने नुन पुग्नेगरी प्रतिघर २४ किलो र कर्मचारीलाई ५ किलो वितरण गर्न व्यवस्था मिलाइएको गाउँपालिकाकी उपाध्यक्ष सौमती रावलले बताउनुभयो । गाउँपालिकाका १६ सय ७७ घर परिवारलाई पुग्नेगरी यस वर्ष समयमै नुन पुर्याएकाले नागरिकले सहज र सस्तो रुपमा घरमै आयोडिनयुक्त नुन पाएको उहाँको भनाइ छ ।

अदानचुली र ताजाकोट गाउँपालिकामा ठेकेदारमार्फत ढुवानी गरिएको साल्ट ट्रेडिङ नेपालगञ्ज कार्यालय प्रतिनिधि खगेन्द्र मल्लले बताउनुभयो । विगतका वर्षहरुमा समयमा नुन नपाएको र दुई दिन हिँडेर ताजाकोट गाउँपालिकाको मैलाकवाडीबाट बोक्नु परेको स्थानीय बासिन्दाले गुनासो गरेका थिए । गाउँपालिकाले ढुवानी गर्ने पक्षलाइ गुनासो गरेपछि यो वर्षदेखि गाउँपालिकाको केन्द्रबाटै स्थानियले सहज रुपले आयोडिन नुन सहुलियत दरमा पाएका छन् ।

प्रतिकिलो ९ रुपैयाँमा नुन वितरण गरिएको मल्लले बताउनुभयो । अदानचुली गाउँपालिकाका ६ वटा वडाका बासिन्दालाई वडाअध्यक्षको सिफारिसमा प्रति घरधुरी २४ किलोको दरले नुनको व्यवस्था गरिएको छ । अदानचुली गाउँपालिका वितरण कार्य सकेपछि ठेकेदारसहित कार्यलयका प्रतिनिधि हुम्लाकै ताजाकोट गाउँपालिकाको केन्द्र मैला छपे्रलामा नुन वितरण गर्ने कार्य तालिका छ ।

नुनको कालोबजारी बन्द

विगतका वर्षहरुमा नुन आएलगतै नजिकका व्यापारी र पैसावालाले ढुवानी ठेकेदारमार्फत सहुलियत मूल्यमा किनेर महंगोमा बेच्ने गरेका थिए । सरकारले तोकेको ९ रुपैयाँ किन्दै प्रतिकिलो ५० रुपैयाँसम्म बिक्री गर्ने व्यापारीहरु यस वर्ष झस्किएका छन् । स्थानीय जनप्रतिनिधि ढुवानी ठेकेदार सहित कार्यलयको प्रत्यक्ष संलग्न भएर वितरण गरिने भएकोले स्थानीयबासिन्दाले सहुलियत रुपमा नुन पाउन थालेका छन् ।

गाउँपालिकाको माग बमोजिम आवश्यकता अनुसार आउँदा वर्षमा पनि सहज ढंगले नुन वितरण गरिने कार्यलयका प्रतिनिधि मल्लले बताउनुभयो ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

रमेश ऐडी

रमेश ऐडी हुम्लाका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्