निर्मलाका हत्यारालाई कारबाही गर्न दृढताका साथ लाग्नुपर्छ : प्रधानमन्त्री ओली

फागुन १०, २०७७ सोमबार १८:४६:४६ | दुर्गा उपाध्याय

कञ्चनपुर – प्रधानमन्त्री केपी शर्मा ओलीले निर्मलाका हत्यारालाई कारबाही गर्न दृढताका साथ अगाडि बढ्नुपर्ने बताउनुभएको छ । सोमबार कञ्चनपुरको बेदकोट नगरपालिकाको दैजी छेला औद्योगिक क्षेत्रको शिलान्यास कार्यक्रममा प्रधानमन्त्री ओलीले कहिलेकाहीँ कसैको व्यक्तिगत स्वार्थका लागि अनुसन्धानलाई मोड्न खोजिने गरेको बताउँदै निर्मलको घटनामा संलग्नलाई कारबाही गर्न दृढताका साथ लाग्नुपर्ने बताउनुभयो ।

‘हामी अब दृढताका साथ अगाडि बढ्नुपर्छ’, प्रधानमन्त्री ओलीले भन्नुभयो, ‘कसैले दबाब दियो, गलत बाटो हिँडाउन खोज्यो भने त्यो गलत बाटो हिँड्नुपर्ने छैन ।’

समाजमा विकृत मनस्थिति भएका व्यक्तिका कारण बलात्कार र हत्याका घटना हुने गरेको बताउँदै उहाँले बैतडीकी किशोरी भागरथी भट्टको हत्यारा पत्ता लगाउन सफल भएकोमा सुरक्षा निकायलाई धन्यवाद व्यक्त गर्नुभयो ।

प्रधानमन्त्री ओलीले कतिपयले यस्ता घटनामा राजनीति गर्न खोजेको आरोप लगाउँदै बैतडीका स्थानीय, प्रशासन, राजनीतिक कार्यकर्ता र सामाजिक अभियन्ताको सहयोगले नेपाल प्रहरी अनुसन्धानमा सफल भएको बताउनुभयो ।

उहाँले आन्दोलन र दबाबका कारण अपराधीलाई छुट दिन नहुने बताउँदै दोषीलाई कानुनी कठघरमा ल्याइने बताउनुभयो । प्रधानमन्त्री ओलीले समाजमा शान्ति–सुरक्षा कायम गर्ने, पीडितलाई न्याय र अपराधीलाई दण्ड दिने काम सरकारको भएको उल्लेख गर्दै त्यो अहिले भइरहेको दाबी गर्नुभयो ।

अन्तिम अपडेट: फागुन २६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।