२५ कराेड लिएर ‘सुन्न किन्न’ केरुङ जाँदै थिए कुसाङ

चैत ५, २०८१ मंगलबार १८:५:५७ | उज्यालो सहकर्मी

काठमाण्डाै – काठमाण्डाैको टोखा नगरपालिकामा रहेको झोर क्षेत्रबाट २५ करोड १९ लाख रुपैयाँ बराबरको युरो र अमेरिकी डलरसहित एक जना पक्राउ परेका छन् ।

गएराति ना ७ ख १६५२ नम्बरको ट्रकमा विदेशी मुद्रा लुकाएर लाँदै गरेको अवस्थामा प्रहरीले सिन्धुपाल्चोककाे भाेटेकाेशी गाउँपालिका–१ का ४३ वर्षीय कुसाङ लामालाई पक्राउ गरेको हो । उनी रसुवाको केरुङतर्फ जाँदै गरेको प्रारम्भिक अनुसन्धानबाट खुलेको प्रहरी आज पत्रकार सम्मेलन गरेर जानकारी गराएको छ ।

लामाले चालक सिट पछाडि फल्स बटम बनाएर रकम राखेको अवस्थामा प्रहरीले पक्राउ गरेको हो । प्रहरीका अनुसार उनी यसअघि ७ किलो सुनसहित कलङ्कीबाट समातिएर २०७८ सालमा छुटेका थिए । प्रहरीका अनुसार त्यस बेला पक्राउ परेका चार जनामध्ये उनी भरियाका रूपमा जोडिएको अनुसन्धानबाट देखिए पनि त्यो सुनको मालिक को थियो भन्ने खुलेको थिएन ।

यस पटक पनि सुन किन्नकै लागि रकम पठाउन लागिएको प्रारम्भिक सूचना मिले पनि त्यतिका धेरै रकम कसरी जम्मा गरियो भन्ने प्रश्नको उत्तर नमिलेको प्रहरीका अनुसन्धान अधिकारीले बताएका छन् । यतिका धेरै युरो र डलर नेपाली बजारबाटै सङ्कलन गरेर जम्मा गरिएको हो कि भारतबाट पनि ल्याइएको हो भन्ने कोणबाट अनुसन्धान अघि बढाएको प्रहरीले जनाएको छ ।

रकम भेटिएको ट्रक झन्डै २० दिनसम्म स्वयम्भूतिरको ग्यारेजमा राखिएको र त्यहीँ फल्स बटम बनाएर रङ्गरोगन गरिएको सूचना प्राप्त गरेको पनि प्रहरीले जनाएको छ । लामाले भने प्रहरीसँगको प्रारम्भिक बयानमा आफूले थानकोटमा ट्रक लिएको र व्यापारीहरूले भनेअनुसार कपडा लिन रसुवागढी जान लागेको बताएका छन् ।

बरामद भएकाे ट्रक लामाकाे आमाकाे नाममा देखिए पनि भाइले आफूलाई चलाउन किनिदिएकाे उनले बताएका छन् ।

अन्तिम अपडेट: चैत ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्