कोरोना सङ्क्रमित भनिएका दाङका एक जना अझै भेटिएनन्

जेठ ३, २०७७ शनिबार १४:३५:४१ | हेमराज शर्मा

दाङ - दाङको तुलसीपुर उपमहानगरपालिका वडा नम्बर ७ मा कोरोना सङ्क्रमित भनिएका एक जना अझै भेटिएका छैनन् ।

शुक्रबार बेलुका कोरोना पुष्टि भएका ३४ वर्षीय पुरुष फेला नपरेका हुन् । सङ्क्रमित भनिएका एक जनाले फोन गरेर आफ्नो रिपोर्ट नेगेटिभ आएको बताएपछि सङ्क्रमित को हुन् भनेर बिहानैदेखि खोजी भइरहेको तुलसीपुरका कोरोना सम्पर्क व्यक्ति विमल केसीले बताउनुभयो ।

उहाँले वडा ७ मा पुगेर खोजी भइरहेको बताउनुभयो । स्वास्थ्य मन्त्रालयले शुक्रबार निकालेको विज्ञप्तिमा तुलसीपुर ७ का ३४ वर्षीय पुरुषमा सङ्क्रमण पुष्टि भएको उल्लेख छ ।

लगत्तै तुलसीपुर उपमहानगरपालिकाका मेयर घनश्याम पाण्डेले सङ्क्रमित व्यक्ति काठमाण्डौमा बस्दै आएको भनेर सामाजिक सञ्जालमा लेख्नुभएको थियो ।

तुलसीपुरका कोरोना सम्पर्क व्यक्ति केसीले पनि सङ्क्रमित व्यक्ति टिचिङ अस्पतालमा कार्यरत रहेको बताउनुभएको थियो तर व्यक्ति फेला परेका छैनन् । उनी को हुन् भनेर जनप्रतिनिधि, सुरक्षाकर्मी र स्वास्थ्यकर्मी नै खोज्न जुटेका छन् । तीसँगै कोरोना सङ्क्रमण पुष्टि भएका अन्य दुई जनालाई भने कोरोना विशेष अस्पताल बेलझुण्डी दाङमा लगिएको छ ।

उनीहरुको स्वास्थ अवस्था सामान्य रहेको अस्पतालले जनाएको छ ।

शिक्षण अस्पतालले भने विज्ञप्ति प्रकाशित गरी कोरोना सङ्क्रमित आफ्नो अस्पतालमा कार्यरत रहेको भन्ने खबरको खण्डन गरेको छ ।

अन्तिम अपडेट: कात्तिक १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।