पर्वत – जलजला गाउँपालिका २ मा निषेधाज्ञाका समयमा बिहे भोज चलाउने व्यक्ति पक्राउ परेका छन् । कोरोनाको 'हटस्पट' जलजला २ माझफाँटमा बिहेको भोज गर्ने दुई दुलहा बुधवार (आज) पक्राउ परेका हुन् । 

सोमवार बिहे गरेका दुई जनाले आज एकै ठाउँमा भिड गरेर भोज चलाएको सूचना पाएपछि प्रहरीले २३ वर्षीय प्रदीप परियार र २४ वर्षीय राजकुमार परियारलाई पक्राउ गरेको छ । यस गाउँमा  कोरोनाका सक्रिय सङ्क्रमितकाे सङ्ख्या ७५ रहेकाे छ । 

जिल्ला प्रशासन कार्यालयले बिहे तथा काजक्रियामा १० जना मात्रै सहभागी हुने आदेश दिए पनि बिहे भोजमा ३०/४० गाउँले भेला भएको प्रहरीले जनाएको छ । प्रहरी पुगेपछि सहभागी भागाभाग भएका थिए । 

प्रहरीले सबै भागेपछि दुई बेहुलालाई समातेर आवश्यक कारबाहीपछि छाड्ने जनाएको छ । जिल्ला प्रहरी कार्यालयका प्रहरी निरीक्षक (इन्स्पेक्टर) प्रदीप पौडेलले स्वास्थ्य मापदण्ड पालना नगरि बिहे भोज गरेको पाइएपछि दुवै बेहुलालाई पक्राउ गरिएकाे बताउनुभयो ।