एक परदेशीको भोगाइमा २०२१

पुष १६, २०७८ शुक्रबार १६:५०:११ | नारायण कोइराला

अङ्ग्रेजी नयाँ वर्ष सुरु हुने दिन जनवरी एक । यसपालि पनि जनवरी आयो । यो आइरहन्छ ।

समय चक्रलाई कसले रोक्न सक्छ र ? हामी सोच्छौ हाम्रो हातमा सब थोक छ तर हाम्रो सोचलाई समयले नै गलत बनाइदिन्छ ।

नगएको समय फर्किएर आउँछ न त परिस्थिति । एकपल्ट गएपछि त्यो गइहाल्छ । फेरि फर्केर आउँदैन ।

अहिले म यूएईमा छु । यहाँ अङ्ग्रेजी नयाँ वर्षलाई नै नयाँ वर्षको रूपमा मनाइन्छ । तर ज्यान जहाँ भए पनि मन त नेपाली हो नि । हाम्रो नयाँ वर्ष त वैशाखमा हो । जे होस् सन् २०२१ हामीबाट बिदा लिएर जाँदै छ अथवा हामी २०२१ लाई बिदाइ गर्दैछौं ।

यो वर्ष पनि परदेशीहरूको लागि अर्थपूर्ण भन्दा पनि सङ्घर्षपूर्ण नै रह्यो । कतिले परदेशी भूमिमा नोकरी गुमाए । कतिले स्वदेश फर्कन पनि रुन पर्‍यो त कोरोना महामारीको कारण कतिपय दाजुभाइ दिदीबहिनीले अकालमै ज्यान गुमाउन पर्‍यो । कतिपय कम्पनीहरू बन्द हुँदा श्रमिकमा पिर चिन्ता रहिरह्यो ।

तर वर्षको मध्यतिर अवस्था केही सामान्य हुँदै जाँदा फेरि सुखी आफैँ फर्किए झैँ भयो ।

कतिपय श्रमिकहरूले घर बिदामा गएर आफ्नो परिवारसँग छुट्टी बिताउने सौभाग्य पनि पाए । घर जाँदा झेल्नु पर्ने समस्याभन्दा पनि घरपरिवार र आफन्तसँग भेट्न पाउँदा संसारै जीते सरह भयो ।

अब त कोरोना कालमा भोगेको त्यो कालो दिन भोग्न नपर्ला भन्ने आशा सबै नेपाली श्रमिकको मनमा थियो । पोहोरभन्दा यसपालि त नयाँ वर्षको खुसी पनि फरक होला भन्ने मेरो आस थियो ।

तर नयाँ वर्ष लाग्दै गर्दा कोरोनाको अर्को त्रास सुरु हुँदै छ यहाँ । कोरोना सङ्क्रमण रोकथामका लागि सरकारले फेरि नियमहरू कडा बनाउँदै लगेको छ । मास्क अनिवार्य गरिएको छ ।

मास्क नलगाई हिँड्ने अनुमति कसैलाई पनि छैन । हिँड्नु पनि हुँदैन । आफ्नो ज्यान र जरिवाना दुवैको ख्याल गर्नपर्छ । यदि जरिवानामा परियो भने परदेशी भूमिमा तिर्नका लागि महिनौँ लाग्छ ।

यहाँका कानुन सजिलै मिच्न सकिँदैन । नियम यदि पालना नगरेमा लाग्ने जरिवानाबाट बच्न पनि सकिँदैन ।

नियम र कानुनको ख्याल गर्दै कोरोनाबाट बच्दै नयाँ वर्ष मनाउन पर्छ हामी परदेशीले पनि । तर हामीले नयाँ वर्षको नाममा मनपरी गर्न भने हुँदैन । हामी परदेशीको एउटा बानी छ बहाना जे सुकै होस् बोतल ल्याउने र खाने ।

हुन त यो नितान्त आफ्नो व्यक्तिगत इच्छाको कुरो हो । तर बोतलमा रम्दैमा खुसीयाली हुने र नरम्दा नहुने भन्ने हुँदैन । त्यसमाथि यो त परदेश हो नि । घर देश जस्तो कहाँ हुन्छ र ।

तर कतिपयले यसलाई स्वतन्त्रताको रूपमा पनि बुझ्छन् । न घर परिवारको कचकच न कसैको रोक तोक । यदि हामी दुःखले परदेशिएका हौ भने हामीले दुःख बुझ्न पर्छ ।

समय अनुकूल नभएको बेलामा आफैलाई बिन्दास बनाउनु भन्दा पनि समय अनुकूल चल्नुपर्छ । परदेशी भूमिमा खाने, होहल्ला गर्ने र झैँ झगडा गर्ने नगरौँ ।

बरु नयाँ वर्षमा केही नयाँ सङ्कल्प गरौँ । आफ्नो अधुरा सपना पूरा गर्ने अठोट राखौँ ।

अङ्ग्रेजी नयाँ वर्ष २०२२ को स्वदेश तथा विदेशमा रहनुभएका तपाईँ सबैमा शुभकामना ।

अन्तिम अपडेट: पुस २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्